YJ Dailynews - шаблон joomla Книги
04
تەمموز

نێچیرڤان بارزانی: هاوسۆزی كەسوكاری قوربانیانی بەغداین

Written by 
Published in هه‌واڵ

نێچیرڤان بارزانی سەرۆكوەزیرانی هەرێمی كوردستان، پەیامێكی ئاراستەی سەرۆكوەزیرانی عێراق و گەلی عێراق كرد و تێیدا هاوسۆزی و هاوخەمیی خۆی بۆ كەسوكاری قوربانیانی تەقینەوە تیرۆریستییەكەی ناوچەی كەڕادەی شاری بەغدا نیشان دا.

ئەمە دەقی پەیامەكەیە :

بۆ بەڕێز حەیدەر عەبادی سەرۆك وەزیرانی عێراق
تەقینەوە تیرۆریستیەكەی داعش لە بەرەبەیانی رۆژی یەكشەممە ٣/٧/٢٠١٦ لە ناوچەی كەڕادەی شاری بەغدا، كارەساتێكی زۆر گەورەی لێكەوتەوە و لە ئەنجامدا ٢١٣ كەسی سڤیل شەهید بوون و ژمارەیەكی زۆریش بەسەختی برینداربوون. بەو بۆنە خەمناكەوە سەرخۆشی لە خۆمان و ئێوەی بەڕێز و هەموو گەلی عێراق دەكەین و هاوخەمی و هاوسۆزیی خۆمان لەگەڵ كەسوكاری قوربانیان دەردەبڕین. بەڕاستی ئەم كردەوە تیرۆریستییە كارەساتێكی گەورەیە و لە خوای مەزن داواكارین دڵنەوایی بداتە هەموو لایەكمان و بریندارانیش بەزوویی چاك ببەنەوە.

تیرۆر و تیرۆریستان جگە لە دڕەندەیی و ڕەشەكوژی و پێشێلكردنی بنەما مرۆڤایەتییەكان، هیچ باوەڕێكی دیكەیان نییە، هەربۆیە هاووڵاتیانی سڤیل لە مانگی ڕەمەزان و لەكاتی خەریكبوون بە پەیداكردنی بژێوی خێزانەكانیان، دەكەنە ئامانج. بەغدا جارێكی دیكە دوای چەند پایتەختێكی دیكە، بووە ئامانجێكی گەورەی تیرۆریستان. لە كاتێكدا هەموو مرۆڤایەتیی لەبەردەم مەترسیی گەورە و بێسنووری تیرۆردایە، هێزەكانی عێراق و پێشمەرگە لە هێڵی پێشەوەی تێكشكاندن و نەهێشتنی مەترسیدارترین رێكخراوی تیرۆریستیدان لە جیهان، كە ئەویش ڕێكخراوی داعشە .

لەنێوبردنی ئەو مەترسییە گەورەیە و پاراستنی گیانی هاووڵاتیان، پێویستی بە هەماهەنگیی تەواو و بەرفروانە، چونكە هێشتا مەترسییەكە زۆر گەورەیە و ئۆپەراسیۆنی گەورەتریش لەبەردەم هێزەكانی عێراق و پێشمەرگەدا ماون بۆ لەنێوبردنی داعش لە كوردستان و هەموو عێراقدا. دەبێ ئەو هێرشە تیرۆریستیانەی كە خەڵكی سڤیل دەكەنە ئامانج و كارەساتی گەورەی لێدەكەوێتەوە، ببێتە هۆكار یەكگرتووییمان لەبەرامبەر تیرۆرستان بەهێزتر ببێت.

نێچیرڤان بارزانی
سەرۆكوەزیرانی هەرێمی كوردستان
٤/٧/٢٠١٦

 

 

Read 343 times
Rate this item
(0 votes)