YJ Dailynews - шаблон joomla Книги
15
ئاب

سڵاوێك بۆ هەڤاڵ مەحمود سەنگاوی

Written by 
Published in هه‌واڵ

فارس قادر فەقێ عەولا
بەڵێ سڵاوێك بۆ بەڕێز هەڤاڵ مەحمود سەنگاوی.. لە بەرواری 10\8\2016 رۆژی چوارشەمە لە رۆژنامەی خەبات ژمارە 5089 لاپەڕەی یەكەم بابەتێكم كەوتە بەرچاو كە جەنابیان باسی حەشدی شەعبی دەكەن و دەڵێن بیستوویانە لە سەر زاری (ئەفسەرێكی گروپی خوراسانی) لە شارەدێی گولاڵە كە گوتوویەتی "پاش تەواوبوونی شەڕی داعش هێرش دەكەنە سەر كوردستان و ئەو ئەفسەرە ئەوەشی گوتووە: شانازی دەكەم بۆ گرتنی كەركووك دژی ئێوە شەڕ بكەم و لە كەركووك شەهید بم.
جەنابی كاك مەحمود سەنگاوی رۆژێك پێشتر لە هەڵەبجە لە كۆنگرەیەكی رۆژنامەوانیدا ئەم قسەیەی لە راگەیاندنەكان لە بەرچاوی كامیراو میدیاكان بە ئاشكرا و بەراشكاوی گوتبوو، هەروەها داوای كردووە و گوتوویەتی "با بێین لە سەر شەرەفی خوێنی شەهیدان لە هەڵەبجە یەكبگرین، داعشی ئێستا بەعسی پێشوون كە لە 1988 هەڵەبجەیان وێران كرد. زۆر بە راشكاوانەش گوتوویەتی: هیچ لایەنێك نییە بخوازێت گەلی كوردستان رزگار بێت "كە مەبەستی حكوومەتە یەك لەدوای یەكەكانی عێراقە تا ئێستا" دەشڵێت: شیعەكان كە رووخۆشی خۆیان بەرامبەر كورد نیشان دەدەن و گوزارشتی لێ دەكەن كەچی سەرقاڵی داڕشتنی پیلانن دژ بە كورد بۆ پاش شەڕی داعش.. دیارە منیش لەگەڵ بەڕێزیان هاوڕا بوومە بەر لە یەك رۆژ لە قسەكانی ئەو، لە بەرواری 9\8\2016لە ژمارە 5088ی رۆژنامەی خەبات بابەتێكم نووسی بە ناونیشانی "هەشتی هەشتی هەشتاو هەشت" كە مەبەستم ساڵی 1988 بوو كە دوژمنانی كورد پاش تەواوبوونی شەڕەكەیان واتە شەڕی عێراق و ئێران روویان لە كوردستان كرد بۆ ئەوەی ئەوەشی ماوە بەتەواوی كاولی بكەن و پاش شەڕەكەیان تەفەروغی تەواویان بۆ گیانی ئێمەی كورد وەرگرت. منیش لە نووسینەكەم ئەم پرسیارەم كردووەو دەڵێم ئایا گەر داعش تەواو بوو داعشی تر دروست نابن؟ ئایا ئەمانەی هەن دۆستن؟! بە دڵنیاییەوە نەخێر، بەڵكو هەمان بۆچوونی بەعس و داعشیان هەیە، ئەی پێشتریش مالیكی نەیگۆت كە فڕۆكەی
F16 هات ئەو كاتە كارەكەی ئاسان دەبێ بۆ گرتنی كوردستان، كەواتە با نەگەڕێینەوە سەر عەقڵیەتی شۆڤێنی ئەو خەڵكانە، ئەوە دیارە رێژەی نەگۆڕە، با بگەڕێینەوە سەر ئەوەی مەبەستە لە ئێمەی كورد چییە؟.
بەڵێ كاك مەحمود سەنگاوی راستی فەرموو "با بێین لە سەر خوێنی شەهیدان لە هەڵەبجە یەك بگرین) و منیش لە وتارێكم (سڵاو لە هەڵەبجە) بە ژمارە 5077 لە رۆژنامەی خەبات دەستخۆشیم لە خەڵكی هەڵەبجە كرد بە رێگا نەدانی سەردانی مالیكی بۆ شارەكەیان، وشەیەكی جوان و پیرۆزە من هەمان قسەم كردووەو دەیكەم، رەنگە تەنها بە شێوازێكی تر كرابێ، بەڵێ وایە.. دەستخۆشیت لێ دەكەم، دیارە زۆرترین ئەوانەی وەك یەك بیر دەكەینەوە، مەرج نییە لە (ئەلفەوە تاكو یا)ی حزبەكان هەمووی قەبوڵ بكرێ، دیارە خاڵی (بەهێز و جوان و مەبەست) لای دڵسۆزان و راست و راستگۆیان و درككردنە بە چاكە و بە خراپەكان. من بۆ خۆم زۆر خۆشحاڵم كە لەگەڵ ئەم بەڕێزە ئاشنایم نییە، بەڵام هاوبەشی بیروڕاین هەر یەكێك لە حزبێك و هەر یەكێك كارێكی تایبەت دەكەین، بەڵام پاش هەموو جیاوازیەكان لە مەسەلە جەوهەریەكان وەك یەك بیر دەكەینەوە.. زۆر گرنكە چاویلكەكانمان یەكبین بن، گرنگە بە رەش بڵێین رەش و بە سپیش بڵێین سپی، بۆیە پاش دەستخۆشی و پاڵپشتی كردنی وتەكانت كە پێشتریش بەر لەوەی بزانم جەنابتان وا بیر دەكەنەوەو من ئەم بۆچوونەو ئەو (گریمانەم) باس كردبوو، گەر وابێ چی دەبێ؟ گەر وا بكەین چی دەبێ؟ وە دەبێت چی بكرێ؟. بۆیە دەڵێم ئومێدەوارم هەڵوەستەیێك لە سەر قسەكانی كاك مەحمود سەنگاوی بكەین كە خۆی لە بەرەكانی جەنگە و وەك پێشمەرگە بیردەكاتەوە نەك وەك سیاسەتمەدارێكی بەرژەوەندیخوازی تایبەت لێرەو لەوێ و ئەوەی گوتی راستگۆیی و راستیەكانی ئەمڕۆ و گۆڕەپانی كوردستان دژ بە گەلی كورد، كە لە لایەن ئەم شۆڤێنیانە رێژەی نەگۆڕە كاتێك كاریان پێمان هەبێ دۆست و برای (مێژوو و ئاینن) كاتێكیش دەستیان هەبوو ناتوانن رق و كینە و دوژمنداریان بشارنەوە، چونكە لە سیفەتی رێوین و ماری سڕن و ناتوانن مەرامە گڵاوەكانیان بشارنەوە، مار هەر مارەو رێویش هەر رێوی. بۆیە دەڵێم با چیتر فێلمان لێ نەكەن و دەستی خۆمان بسووتێنین و لە یادیان نەكەین "دەست غەڵەت دانی خۆمان پەشیمانی لە دواوەیە و مێژووش نامان بورێت".
بەڵێ كاك مەحمود سەنگاوی سڵاو لە بەڕێزت كە تۆش لە قسەكانت بوركانی غەزەبت تەقیەوەو پەنجەت لە سەر راستییەكان دانا، بەڵێ ئەوان (چ فلان بن و چ فلان) هەمان بیركردنەوەیان هەیە، كە لاواز بوون دۆستمانن و كە بەهێزیش بوون گورگ و رێوین بۆ جەستەمان. بەڵێ یەكڕیزی و رێككەوتن و برایەتی و گەڕانەوە بۆ باوەشی خەڵك و گوێ گرتن لە میللەت هەوێنی سەركەوتنە. بارزانیی نەمریش فەرموویەتی "ئەگەر دڵی میللەت لەگەڵمان بێت دوژمن هەزار هێندە بە هێز بێت ناتوانێت بمانبەزێنێت" لە كۆتاییدا دەڵێم پەنا بە خوا كورد هەر سەركەوتن بە دەست دێنێ بە هێزو بازووی پێشمەرگە و دڵسۆزانی ئەم گەلەو خوێنی شەهیدان. دووبارە دەڵێم ئەم بۆچوون و راستگۆییەی بەڕێزتان جێگای رێزە.
ئەندامی ئەنجومەنی سەركردایەتی پارێزگای هەولێر (پ. د. ك)

Read 937 times
Rate this item
(0 votes)