YJ Dailynews - шаблон joomla Книги

Anjuman46

19
تشرینی دووەم

 

به‌ڕێز ڕێكس تیله‌رسن وه‌زیری ده‌ره‌وه‌ی ئه‌مه‌ریكا دووپاتى ده‌كاته‌وه‌ كه‌ واشنتۆن له‌ په‌یوه‌ندیی به‌رده‌وامدایه له‌گه‌ڵ به‌غدا و حكوومه‌تى عێراق هانده‌دات زه‌مینه‌ی ده‌ستپێكردنی گفتوگۆیه‌كی جددی له‌گه‌ڵ حكوومه‌تى هه‌رێمى كوردستان بڕه‌خسێنێت تاكو بگه‌ن به‌ ئامانجێكی خوازراو.


ئه‌مڕۆ شه‌ممه‌ 18/11/2017 له‌ په‌یوه‌ندیییه‌كى ته‌له‌فۆنیدا له‌گه‌ڵ به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، به‌ڕێز تیله‌رسن وێڕاى پێشكه‌شكردنى پرسه‌ و سه‌ره‌خۆشیی خۆی و وڵاته‌كه‌ی بۆ قوربانیانی ئه‌و بوومه‌له‌رزه‌یه‌ی هه‌فته‌ی ڕابردوو هه‌رێمی كوردستانی گرته‌وه‌، ئاماده‌ییی وڵاته‌كه‌یشی بۆ هه‌ر هاوكاری و هه‌ماهه‌نگییه‌ك له‌مباره‌یه‌وه‌ نیشان دا.

به‌رێز تیله‌ر‌سن خۆشحاڵیی خۆی بۆ هێوربوونه‌وه‌ی گرژیى هێڵه‌كانی نێوان پێشمه‌رگه‌ و هێزه‌ عیراقییه‌كان ده‌ربڕی و دانبه‌خۆداگرتنی هه‌ردوولای بۆ پاراستنی ئارامی به‌رز نرخاند، هه‌روه‌ها ده‌ستخۆشی له‌ حكوومه‌تی هه‌رێمی كوردستان كرد بۆ ڕێزگرتن له‌ شیرۆڤه‌ی دادگای فیدرالی عیراق سه‌باره‌ت ده‌ستوور، جه‌ختیشى له‌ پاراستنى ئارامى كرده‌وه‌ له‌پێناو زه‌مینه‌سازی بۆ دیالۆگێكی جددیى هه‌ولێر و به‌غدا له‌سه‌ر بنه‌مای ده‌ستوور.

لای خۆیه‌وه‌ به‌ڕێز نێچیرڤان بارزانى دووپاتى كرده‌وه‌ كه‌ هه‌رێمى كوردستان وه‌ك هه‌میشه‌ ڕایگه‌یاندووه‌ ئاماده‌یه‌ له‌ دیالۆگێكى جددیدا له‌گه‌ڵ حكوومه‌تى فیدراڵى عێراق هه‌موو كێشه‌كان له‌سه‌ر بنه‌ماى ده‌ستوور چاره‌سه‌ر بكات، هه‌روه‌ها هیواى خواست ئه‌مه‌ریكا و هاوپه‌یمانان ڕۆڵى خۆیان له‌ ده‌سپێكردنى دیالۆگى هه‌ولێر ـ به‌غدا بگێڕن و له‌مباره‌یه‌وه‌ هاوكار و پشتیوان بن.

به‌ڕێزیان سوپاسی ئه‌و په‌یوه‌ندییه‌ ته‌له‌فۆنییه‌ و سه‌ره‌خۆشیی به‌رێز تیله‌رسن ـ ى بۆ قوربانیانی بوومه‌له‌رزه‌ كرد و ئاماژه‌ی به‌وه‌ دا كه‌ پێشوازی له‌ هه‌ر هاوكارییه‌ك ده‌كه‌ن بۆ لێقه‌وماوان. جه‌ختی له‌وه‌ش كرده‌وه‌ كه‌ پێویسته‌ گه‌مارۆ‌ی سه‌ر فڕۆكه‌خانه‌كانی هه‌رێمی كوردستان هه‌ڵبگیرێت، به‌تایبه‌تی كه‌ له‌ بواری مرۆییدا پێویستییه‌كی زۆرییان هه‌یه،‌ چونكه‌‌ به‌شێكی هاوكارییه‌كان‌ بۆ زیاتر له‌ ملیۆنێك و پێنجسه‌د هه‌زار ئاواره‌ و په‌نابه‌ر له‌ هه‌رێمی كوردستان، له‌ ڕێگه‌ی فڕۆكه‌خانانه‌كانه‌وه‌ دابین ده‌كرێت.

19
تشرینی دووەم

 

 

مەسرور بارزانی راوێژکاری ئەنجوومەنی ئاسایشی هەرێمی کوردستان پێشوازیی لە

برێت مەکگورک نێردەی تایبەتی سەرۆکی ئەمریکا بۆ هاوپەیمانیی نێودەوڵەتی جەنگی دژ بە داعش کرد.

لە میانەی دیدارەکەیاندا برێت مەکگورک لە پەیوەندی بە دوا پەرەسەندنە سەربازی و گرژیەکانی نێوان هەولێر وبەغدا ڕایگەیاند کە ئەمەریکا هەرجۆرە پەنا بردنێک بۆ کرداری سەربازی لە یەکلاکردنەوەی کێشەکان ڕەت دەکاتەوە و هەموو هەوڵ و تواناکانیشی دەخاتە گەڕ بۆ ئەوەی گرژیەکان بڕەوێنرێنەوە و هەردوو لا دەست بە گفتوگۆ بکەن بۆ ئەوەی بە شێوازێکی ئاشتیانە و لە سەر بنەمای دەستور کێشەکانیان چارەسەر بکەن.

برێت مەکگورک هەڵوێستی وڵاتەکەی لە پاڵپشتیی حکومەتی هەرێم وەک کیانێکی دەستوری دووپات کردەوە و وتی خوازیارن هەرێمی کوردستان بە یەکگرتوویی وبە هێزەوە لە چوارچێوەی دەستور لە گشت بوارەکاندا لە پێشکەوتن بەردەوام بێت و جەختیشی لە هەماهەنگی و بەهێزکردنی پەیوەندیەکانی هەرێم و ئەمەریکا کردەوە.

لە میانەی دیدارەکەدا مەسرور بارزانی وێڕای جەخت کردنی لە بەردەوامیی پەیوەندیی نێوان هەرێمی کوردستان و ئەمەریکا، ئاماژەی بەوەدا کەهەرێمی کوردستان هەمیشە بروای بە رێگەچارەی ئاشتیانە و گفتوگۆ هەبووە بۆ چارەسەریی کێشەکان لە ناوچەکەدا و ئێشتاش خوازیارە دانوستانەکانی نێوان هەولێر و بەغدا هەرچی زووتر بۆ ئاستی ئیداری و سیاسی بگوازرێنەوە. راوێژکاری ئەنجوومەنی ئاسایشی هەرێم لە ئاماژە بە دوا گرژیە سەربازیەکان وتی جێبەجێ کردنی دەستور بە ئامرازە نادەستوریەکان ناکرێت، بەڵکو بە گفتوگۆ و دانوستانی ڕاستەوخۆ و لەیەک گەیشتن دەتوانرێت چارەسەریی گونجاو بۆ کێشەکان بدۆزرێنەوە.

 

19
تشرینی دووەم

 

نێرده‌ی تایبه‌تی سه‌رۆكی ئه‌مه‌ریكا بۆ شه‌ڕی دژی داعش، به‌ڕێز برێت مه‌كگۆرك جه‌ختی له‌سه‌ر دۆستایه‌تی و په‌یوه‌ندییه‌كانی نێوان هه‌ولێر و واشنتۆن كرده‌وه‌ و هیوای په‌ره‌پێدانی زیاترى په‌یوه‌ندییه‌كانی هه‌ردوولاى له‌ هه‌موو بواره‌كاندا خواست.


له‌ دیدارێكى ئێواره‌ى ئه‌مڕۆ پێنجشه‌ممه‌ 16/11/2017ى به‌ڕێز نێچیرڤان بارزانی، سه‌رۆك وه‌زیرانی هه‌رێمی كوردستان و به‌ڕێز مه‌كگۆركدا، كه‌ به‌ڕێز قوباد تاڵه‌بانى جێگرى سه‌رۆك وه‌زیران ئاماده‌ى بوو، هه‌ردوولا خۆشحاڵیی خۆیان به‌ ڕاگرتنی گرژییه‌كانی نێوان هێزه‌كانی عیراق و پێشمه‌رگه‌ ده‌ربڕی و به‌ پێویستیان زانی دیالۆگێكی جددیى هه‌ردوولا له‌سه‌ر بنه‌مای ده‌ستوور بۆ چاره‌سه‌ركردنی كێشه‌كان ده‌ست پێ بكرێت.



به‌ڕێز سه‌رۆك وه‌زیران ئاماژه‌ی به‌ په‌یوه‌ندییه‌كانی هه‌ولێر و واشنتۆن كرد و هیوای خواست زیاتر په‌ره‌یان پێ بدرێت، هه‌روه‌ها سوپاسی هاوكارییه‌كانى ئه‌مه‌ریكاى بۆ هه‌رێمی كوردستان كرد و دووپاتی كرده‌وه‌ كه‌ ده‌بێ كۆمه‌ڵگه‌ی نێوده‌وڵه‌تی هه‌وڵی زه‌مینه‌خۆشكردن بۆ ده‌ستپێكردنی گفتوگۆیه‌كى جددیى نێوان هه‌ولێر و به‌غدادا بدات، كه‌ تاكه‌ ڕێگه‌ى چاره‌سه‌رى كێشه‌كانه‌ و دووپاتى كرده‌وه‌ هه‌رێمی كوردستان هیچ كاتێك لایه‌نگری به‌ریه‌ككه‌وتن نه‌بووه‌ و هه‌میشه‌ ئاماده‌ى گفتوگۆیه‌.

تاوتوێكردنى بارودۆخی عیراق و هه‌رێم و ناوچه‌كه‌ به‌گشتی، لایه‌نێكى دیكه‌ى دیداره‌كه‌ بوو.

09
تشرینی دووەم

 

 

8/11/2017 مەسرور بارزانی راوێژکاری ئەنجوومەنی ئاسایشی هەرێمی کوردستان پێشوازیی لە (کنوت لێن) نێردەی تایبەتی وڵاتی نەرویج بۆ رۆژهەلاتی ناوەراست و شاندی بالیۆزخانەی نەرویج لە بەغدا کرد.

لەم دیدارەدا پەیوەندیەکانی نەرویج و هەرێم و دوا پەرەسەندنەکانی ناوچەکە بە گشتی و پەیوەندیەکانی هەولێر و بەغدا گفتوگۆی لە سەر کرا و شاندی نەرویجی پشتیوانیی خۆی بۆ گفتوگۆی نێوان هەولێر و بەغدا لە سەر بنەمای جێبەجێ کردنی دەستور دووبارە کردەوە و ئاواتیان خواست هەرچی زووتر گرژیەکان کۆتایی پێ بهێنرێن و هەردوولا خۆیان بۆ قۆناغی دوای داعش و ئاوەدانی و گەشەپێدانی وڵات ئامادە بکەن.

پەیوەست بەم بابەتە راوێژکاری ئەنجوومەنی ئاسایشی هەرێم جەختی لە سەر هەڵوێستی هەرێم بۆ ئەنجامدانی گفتوگۆ دووبارە کردەوە و ئاماژەی بەوە دا کە کاردانەوەکانی بەغدا لە بەرامبەر ریفراندۆم نادەستورین و دەرخەری نیازخراپیی هەندێ گروپ و لایەنە لە بەغدا لە بەرامبەر کۆی سیستەمی دەستوری و سیاسیی ئێستای عێراق.

راوێژکاری ئەنجوومەنی ئاسایشی هەرێم دوپاتی کردەوە کە رێکاری سەربازی بەرامبەر بە هەرێم هیچ ئاکامێکی نابێت و دۆخەکە ئاڵۆزتر دەکات بۆیە دەبێ بەغدا دانوستانی بێ مەرج لە سەر بنەمای دەستور قبوڵ بکات و کۆی دەستور جیبەجێ بکرێت نەک تەنیا چەند بڕگەیەک کە لێکدانەوەی تایبەتی بۆ دەکرێت و لە خزمەت ئامانجی لایەنێکی کێشەکەدایە.