YJ Dailynews - шаблон joomla Книги

Anjuman46

04
تشرینی یەکەم

 


ڕۆژی سێشەممە ٣ـی١٠ـی٢٠١٧، بەڕێز مه‌سعود بارزانى سەرۆکی هەرێمی کوردستان، لە په‌يامێكى ڤیدیۆییدا به‌ بۆنه‌ى كۆچى دوايى مام جه‌لال تاڵه‌بانى، سكرتێرى گشتيى يه‌كێتى نيشتيمانى كوردستان و سه‌رۆك كۆمارى پێشووى عێراق، ماتەمینیی گشتی راگه‌ياند.
ئەمە دەقی پەیامەکەیە:

بەناوی خوای گەورە و میهرەبان

هاووڵاتیانی خۆشەویستی کوردستان

بە خه‌م و په‌ژاره‌یه‌كی زۆره‌وه‌ هه‌واڵی كۆچی دوایی (سه‌رۆك مام جه‌لال)مان پێ گه‌یشت.

پرسه‌ و سه‌ره‌خۆشیی خۆم ئاراسته‌ی خانه‌واده‌ی تاڵه‌بانی و به‌ تایبه‌تی، (هێرۆخان، كاك بافڵ و كاك قوباد) ده‌كه‌م، به‌دڵ هاوبه‌شی خه‌میانین.
له‌ده‌ستدانی سه‌ركرده‌یه‌كی وه‌ك (مام جه‌لال) زیانێكی گه‌وره‌یه‌ بۆ گه‌له‌كه‌مان و به‌ ئاسانی پڕ ناكرێته‌وه‌.

سه‌ره‌خۆشی له‌ خۆمان و هه‌موو گه‌لی كوردستان و، برایانی سه‌ركردایه‌تیی یه‌كێتیی نیشتیمانیی كوردستان و هه‌موو ئه‌ندامانیان ده‌كه‌م.
داواكارم له‌ خوای گه‌وره‌، گیانی برای به‌رێزم (مام جلال) به‌ به‌هه‌شتی به‌رین شاد بكات.

بۆخۆیشم هه‌ڤاڵ و برا و پشتیوانێكی به‌هێزم له‌ ده‌ست دا. جێگای شانازییه‌ كه‌ هه‌ردووكمان پێكه‌وه‌ و له‌گه‌ڵ برایانی تر، توانیمان زۆر كۆسپ و ته‌گه‌ره‌ له‌سه‌ر ڕێگه‌ی خه‌بات و تێكۆشانمان هه‌ڵگرین. هه‌روه‌ها زۆر قۆناغی تاڵ و ناخۆشمان بڕی.

شانازییه‌ كه‌ زۆرێك له‌ ده‌سته‌كه‌ته‌كانی ئه‌مڕۆ ده‌گه‌ڕێته‌وه‌ بۆ ئه‌و برایه‌تییه‌ی كه‌ پێكه‌وه‌ بناغه‌یمان دانا.

ئێستایش باشترین وه‌فا بۆ گیانی برای به‌ڕێز (مام جه‌لال) و، گیانی هه‌موو شه‌هیدانی ڕێگای ڕزگاریی گه‌له‌كه‌مان، پته‌وتركردن و به‌هێزتركردنی یه‌كڕیزیمانه‌، هه‌ر به‌وه‌ش ده‌توانین بگه‌ینه‌ ئه‌و ئامانجه‌ پیرۆزه‌ی كه‌ سه‌ركرده‌كانمان و هه‌زاران ڕۆڵه‌ی ئه‌م گه‌له‌ گیانیان به‌خت كرد له‌ پێناویدا.

انا لله واتا اله راجعون
كل نفس ذائقة الموت

به‌م بۆنه‌ خه‌مناكه‌وه‌، هه‌فته‌یه‌ك ماته‌مینیی گشتی راده‌گه‌یەنین.''

 

02
تشرینی یەکەم

 

(مه‌سرور بارزانی) راوێژكاری ئه‌نجوومه‌نی ئاسایشی هه‌رێمی كوردستان پێشوازی له‌ شاندێكی دیپلۆماتی نه‌رویجی به‌سه‌رۆكایه‌تی ( كارسێن كارلسێن) جێگری باڵیۆز كرد.

له‌ دیدارێكدا دوا په‌ره‌سه‌ندنه‌ سیاسی و سه‌ربازییه‌كانی ناوچه‌كه‌ و ئه‌نجام و كاردانه‌وه‌كانی دوای ‌پرۆسه‌ی ریفراندۆمی كوردستان گفتوگۆی له‌باره‌وه‌ كرا.
له‌ دیداره‌كه‌دا (مه‌سرور بارزانی) باسی له‌ هۆكاره‌كانی ئه‌نجامدانی ریفراندۆمی سه‌ربه‌خۆیی كرد و ئاماژه‌ی به‌وه‌دا، كه‌ بڕیاری گه‌لی كوردستان بڕیارێكی مولزه‌مه‌، پێویسته‌ كۆمه‌ڵگه‌ی نێوده‌وڵه‌تی رێز له‌و بڕیاره‌ بگرێت، كه‌ گه‌له‌كه‌مان به‌ شێوازێكی دیموكراسیانه‌ ده‌ری بڕیووه‌.

هه‌روه‌ها په‌یوه‌ست به‌ كاردانه‌وه‌كان دووپاتی له‌ گفتوگۆ و دیالۆگی بونیاتنه‌رانه‌ كرده‌وه‌، به‌تایبه‌تی دانوستانێك، كه‌ له‌لایه‌ن كۆمه‌ڵگه‌ی نێوده‌وڵه‌تییه‌وه‌ پشتیوان كراو بێت و رایگه‌یاند، گه‌لی كوردستان له‌ژێر هیچ گوشارو سزایه‌كی به‌كۆمه‌ڵ پاشه‌كشه‌ له‌ ویست و بڕیاری خۆی ناكات، بۆیه‌ باشترین رێگه‌چاره‌ ده‌ستكردنه‌ به‌ گفتوگۆ و شێوازی ئاشتیانه‌ بۆ چاره‌سه‌ركردنی پرسه‌ هاوبه‌شه‌كان.

له‌لای خۆیانه‌وه‌ شاندێكی دیپلۆماتكارانی نه‌رویجی دووپاتیان له‌ په‌یوه‌ندی دووقۆڵی كرده‌وه‌ و ئاماژه‌یان به‌وه‌دا، كه‌ ئه‌وان خوازیاران گرژییه‌كان خاوبكرێنه‌وه‌‌، چونكه‌ ناوچه‌كه‌ به‌رگه‌ی گرژی زیاتر ناگرێت، پێویسته‌ له‌بری هه‌ڕه‌شه‌ و گرژی په‌نا بۆ گفتوگۆ و رێگه‌چاره‌ی ئاشتیانه‌ ببردرێت

 

01
تشرینی یەکەم

 

(ئێستا كە ڕیفراندۆم ئەنجام دراوە داوا دەكەم دەست بە گفتوگۆ بكەن)


لە بیست و حەوتی ئەیلوولی 2017ـدا مایكل فاڵن وەزیری بەرگریی بریتانیا لە نامەیەك بۆ بەڕێز مەسعود بارزانی سەرۆكی هەرێمی كوردستان، سوپاسی سەرۆك بارزانی دەكات بۆ میوانداری و ئەو گفتوگۆ ڕاشكاوانەیە كە لەكاتی سەردانیدا بۆ كوردستان لەنێوان ئەو و سەرۆك بارزانی پەیوەست بە بابەتی ڕیفراندۆم ئەنجام دراوە.

لە بەشێكی تری نامەكەدا وەزیری بەرگریی بریتانیا ستاییشی گەلی كوردستانی كردووە كە لە بەرەی پێشەوەی شەڕی تیرۆر بوونە و هەزاران شەهید و قوربانیان لەو شەڕە داوە و دەستخۆشیشی كردووە كە سەرباری بوونی شەڕ و كێشەی گەورە هاوسەنگی لە حوكمڕانیی كوردستان ڕەچاو كراوە.

مایكل فاڵن وەزیری بەرگریی بریتانیا لە بەشێكی تری نامەكەیدا بۆ سەرۆك بارزانی نووسیویەتی: "ئێستا كە ڕیفراندۆم ئەنجام دراوە داواتان لێ دەكەم كە دەست بە گفتوگۆیەكی بنیاتنەرانە بكەن لەگەڵ بەغدا و دراوسێكان تاكوو بگەنە چارەسەرێكی گونجاو بۆ هەموو لایەك و بە شێوەیەكی ڕێك و پێك و هێمنانە".

وەزیری بەرگریی بریتانیا لە كۆتایی نامەكەیدا هانی سەرۆك بارزانی دەدات كە بەردەوام بن لە شەڕی داعش بە جۆرێك كە ڕێگە نەدرێت دووبەرەكی بكەوێتە نێوان كوردستان و عێراقییەكان لە شەڕی دژی تیرۆر و ناوچە ئازادكراوەكان بە هێمنی و ئارامی بمێننەوە.

28
ئەیلول

 

 

27/9/2017 مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان له‌میانه‌ی پێشوازیكردنی له‌ گرووپی گشت لایه‌نه‌كانی په‌رله‌مانی به‌ریتانیا APPG))، كه‌ به‌سه‌رۆكایه‌تی (جاك لۆپرێستی) بۆ چاودێریكردنی ریفراندۆمی سه‌ربه‌خۆیی هاتبوونه‌ كوردستان، رایگه‌یاند، پێویسته‌ جیهان رێز له‌و ویسته‌ی گه‌لی كوردستان بگرێت، كه‌ به‌شێوه‌یه‌كی دیموكراسیانه‌ به‌هه‌موو جیهانی راگه‌یاند.

له‌دیدارێكدا شاندی میوان باسی له‌ به‌ڕێوه‌چوونی پرۆسه‌ی ریفراندۆمی سه‌ربه‌خۆیی كرد و ئاماژه‌ی به‌وه‌دا، كه‌ پرۆسه‌كه‌ زۆر به‌ باشی به‌ڕیوه‌چوو، له‌ گه‌ڕانه‌وه‌یاندا هه‌موو هه‌وڵی خۆیان له‌ناو په‌رله‌مان ده‌ده‌ن. له‌وباره‌وه‌ (لۆپرێستی) وێڕای پیرۆزباییكردن له‌گه‌لی كوردستان، جه‌ختی له‌وه‌ كرده‌وه‌، كه‌ ئه‌وان پشتگیری له‌ڕای خه‌ڵك بۆ مافی چاره‌ی خۆنووسیی گه‌لان ده‌كه‌ن و گوتی: ئێمه‌ زۆر به‌و ریفراندۆمه‌ خۆشحاڵ بووین.

له‌لای خۆیه‌وه‌ مه‌سرور بارزانی باسی له‌ هه‌نگاوه‌كانی دوای ریفراندۆم كرد و داوای له‌ شانشینی به‌ریتانیا و ئه‌ندامانی كۆمه‌ڵگه‌ی نێوده‌وڵه‌تی كرد رۆڵی خۆیان بگێرن و هانی عێراق بده‌ن ده‌ست بكات به‌ گفتوگۆ و دیالۆگی بونیادنه‌ر له‌گه‌ڵ هه‌رێمی كوردستان و له‌ ره‌فتار و هه‌ڵسوكه‌وتی ئیستفزازی دووربكه‌وێته‌وه‌ له‌پێناو ئاشتی و سه‌قامگیری، كه‌ داوای ئێمه‌ و جیهانی ئازاده‌ و رایگه‌یاند، گه‌لی كوردستان مافێكی سرووشتی خۆی پیاده‌ كرد، كه‌ له‌ چارته‌ره‌كانی نه‌ته‌وه‌ یه‌كگرتووه‌كان جێگیره‌. هه‌روه‌ها ئاماژه‌ی به‌وه‌دا، كه‌ پێویسته‌ كۆمه‌ڵگه‌ی نێوده‌وڵه‌تی گووشار له‌ عێراق بكات بۆئه‌وه‌ی ئه‌م پرسه‌ به‌ شێوه‌یه‌كی ئاشتیانه‌ یه‌كلابێته‌وه‌.

له‌ به‌شێكی دیكه‌ی وته‌كانیدا راوێژكاری ئه‌نجوومه‌نی ئاسایشی هه‌رێمی كوردستان دووپاتی كرده‌وه‌، كه‌ پێویسته‌ جیهان رێز له‌و ویسته‌ی گه‌لی كوردستان بگرێت، كه‌ به‌شێوه‌یه‌كی دیموكراسیانه‌ به‌هه‌موو جیهانی راگه‌یاند.

هه‌ر له‌و دیداره‌دا تیشكخرایه‌ سه‌ر په‌ره‌سه‌ندنه‌ سه‌ربازییه‌كانی ناوچه‌كه‌ و به‌رده‌وامیدان و درێژه‌دان به‌ یارمه‌تییه‌كانی به‌ریتانیا بۆ هه‌رێمی كوردستان له‌ بواره‌ جیاكاندا.