YJ Dailynews - шаблон joomla Книги

هه‌واڵ (572)

27
نیسان

باڵیۆزی ژاپۆن لە عێراق، لە دیدارێكیدا لەگەڵ سەرۆكوەزیرانی هەرێمی كوردستان، ڕایگەیاند، حكوومەتی وڵاتەكەی كە ئێستا تەنیا كۆنسووڵی فەخرییان لە هەرێمی كوردستاندا هەیە، بڕیاری داوە لە داهاتوودا كۆنسووڵخانەی گشتیی وڵاتەكەی لە هەولێری پایتەختی هەرێمی كوردستاندا بكاتەوە.

نێوەڕۆی ئەمڕۆ سێشەممە 26 - 4 – 2016، (نێچیرڤان بارزانی) سەرۆكوەزیرانی هەرێمی كوردستان، پێشوازی لە (فیومیۆ ئیوای)، باڵیۆزی ژاپۆن لە عێراق و شاندێكی یاوەری كرد.

لە دیدارێكدا بارودۆخی سیاسیی ناوچەكە بە گشتی و عێراق و هەرێمی كردستان بە تایبەتی خرایە بەر باس و گفتوگۆ و تیشك خرایە سەر ئەو پڕۆژە هاوكاریانەی كە وڵاتی ژاپۆن پێشكەش بە عێراقی كردوون، بە تایبەتی ئەوانەی لە هەرێمی كوردستان جێبەجێ كراون، یان لە ژێر جێبەجێكردندان، هەروەها بەردەوامیی هاوكارییەكانی ژاپۆن بۆ عێراق و هەرێمی كوردستان بەپێی ئەو بڕیارەی پێشتر داویەتی، دووپات كرایەوە.

باڵیۆزی ژاپۆن لە عێراق هەروەها ڕایگەیاند، حكوومەتی وڵاتەكەی كە ئێستا تەنیا كۆنسووڵی فەخرییان لە هەرێمی كوردستاندا هەیە، بڕیاری داوە لە داهاتوودا كۆنسووڵخانەی گشتیی وڵاتەكەی لە هەولێری پایتەختی هەرێمی كوردستاندا بكاتەوە.

 

تاوتووكردنی دۆخی سیاسی و ئەو هەنگاوانەی حكوومەتی هەرێمی كوردستان بۆ ڕیفۆرم و چاكسازی ناویەتی، لایەنێكی دیكەی دیدارەكە بوو و، لەمبارەیەیشەوە (نێچیرڤان بارزانی) ئاماژەی بەوە دا كە، حكوومەتی هەرێمی كوردستان لەو پرۆسەیە زۆر جددییە و پێویستی بە هاوكاریی هەموو لایەك هەیە بە تایبەتی كە چاكسازییەكان لەسەر بنەمایەكی زانستیی ڕێكوپێك ئەنجام بدرێن و لەسەر ئەم هەوڵانەشی بەردەوام دەبێت. هەروەها سوپاسی ئەو هاوكارییانەی وڵاتی ژاپۆنی كرد كە لە چوارچێوەی پرۆژەكانیان بۆ عێراق، لە هەرێمی كوردستاندا جێبەجێی دەكەن.

27
نیسان

 سەرۆكوەزیرانی هەرێمی كوردستان، لە كۆبوونەوەیدا لەگەڵ بەرپرسی گشتیی كۆمیسیاری باڵای پەنابەرانی سەر بە نەتەوە یەكگرتووەكان، داوای لێ كرد لە ناوەندە نێودەوڵەتییەكاندا هەوڵ بدەن بۆ ئەوەی بە جیددی سەیری پێداویستییەكانی هەرێمی كوردستان بكرێت.

پێشنیوەڕۆی ئەمڕۆ سێشەممە 26 - 4 – 2016، (نێچیرڤان بارزانی) سەرۆكوەزیرانی هەرێمی كوردستان، پێشوزای لە (د. ئەمین عەواد) بەرپرسی گشتیی كۆمیسیاری باڵای پەنابەرانی سەر بە نەتەوە یەكگرتووەكان UNHCRبۆ ڕۆژهەڵاتی ناوەڕاست و باكووری ئافریكا و شاندێكی یاوەری كرد.

سەرەتای دیدارەكە، شاندی میوان باسیان لە دوا پێشهاتەكان كرد و سوپاس و پێزانینی خۆیان بۆ ئەو هەموو هاوكارییەی لەلایەن حكوومەتی هەرێمی كوردستانەوە پێشكەش بە ڕێكخراوەكەیان دەكرێت، دەربڕی. سوپاسی خەڵك و حكوومەتی هەرێمی كوردستانیشیان كرد كە بە ئیمكانیاتێكی كەم و لەم بارودۆخە ناهەموارەی ڕووی لە هەرێمی كوردستان كردووە، توانیویانە بە باشترین شێوە هاوكاری پێشكەش بە ئاوارە و پەنابەران بكەن.

هەروەك پێزانینی خۆیان بۆ ئەو هەموو قوربانییە پیشان دا كە پێشمەرگە بۆ ڕووبەڕووبوونەوەی تیرۆر داویەتی و دووپاتیان كردەوە كە، لە هەوڵەكانیان بەردەوام دەبن بۆ بەدەستهێنانی پشتگیریی زیاتری نێودەوڵەتی بەمەبەستی هاوكاریكردنی هەرێمی كوردستان و ئەو ئاوارە و پەنابەرانەی لە ترسی تیرۆر ڕوویان لە هەرێمی كوردستان كردووە.

لە بەشێكی دیكەی قسەكانیاندا، باسیان لە پرۆگرامەكانی داهاتووی UNHCRبە هەماهەنگی لەگەڵ وەزارەتی پلاندانانی هەرێمی كوردستان كرد بۆ هەر پێشهاتێك بە تایبەتی كە پێشبینی دەكرێت لە كاتی پرۆسەی ئازادكرنی مووسڵدا ژمارەیەكی زۆرتری ئاوارە و پەنابەر ڕوو لە هەرێمی كوردستان بكەن و بۆ ئەم مەبەستە ڕێ و شوێنی پێویست بگرنە بەر، بۆ ئەوەی بە باشترین شێوە ئەركەكان جێبەجێ بكرێن.

لای خۆیەوە، سەرۆكوەزیرانی هەرێمی كوردستان سوپاسی سەردانەكە و (ئەمین عەواد)ـی كرد كە هەر لە ساڵی 1991 و لە كاتی كۆچی ملیۆنیی خەڵكی كوردستان بە مەبەستی هاوكارییكردن هاتووەتە هەرێمی كوردستان و هەر لەو كاتەوە تا ئێستا چاودێریی هەرێمی كوردستانی كردووە و، داوایشی لێ كرد لە هەوڵەكانی بەردەوام بێت و حكوومەتی هەرێمی كوردستانیش لە پشتگیریكردنی ئەو هەماهەنگییە باشەی نێوان وەزارەتە پەیوەندیدارەكانی هەرێم و ڕێكخراوەكەیان هەیە، بەردەوام دەبێت.

هەروەها سوپاس و پێزانینی بۆ ستافی هەرێمی كوردستان و بەرپرسی نووسینگەی UNHCRـی لە عێراق دەربڕی كە ئەوانیش هاوكار و هەماهەنگ بوون و، داوای لێ كردن لە ناوەندە نێودەوڵەتییەكاندا هەوڵ بدەن بۆ ئەوەی بە جیددی سەیری پێداویستییەكانی هەرێمی كوردستان بكرێت.

 

تاوتووكردنی دواپێشهاتەكانی ناوچەكە و چەند بابەتێكی دیكەی پەیوەندیدار و ئاڵوگۆڕكردنی بیروڕا لەسەریان، لایەنێكی دیكەی دیدارەكە بوو.

27
نیسان

باڵیۆزی نەمسا لە عێراق، لە دیداریدا لەگەڵ سەرۆكوەزیرانی هەرێمی كوردستان، ڕایگەیاند، وڵاتەكەی و ئەورووپا بە گشتی ڕێز لە خەباتی خەڵكی كوردستان و پێشمەرگە دەگرن كە بە خوێنی خۆیان ڕووبەڕووی تیرۆر بوونەتەوە و دەڤەرەكانیان لە مەترسیی تیرۆر پاراستووە. هەروەك بەردەوامیی هەوڵەكانی وڵاتەكەی لە ڕێگەی نەتەوە یەكگرتووەكانەوە و لەسەر ئاستی وڵاتان، بۆ پشتگیرییكردنی هەرێمی كوردستان، دووپات كردەوە

پێشنیوەڕۆی ئەمڕۆ سێشەممە 26 - 4 – 2016، (نێچیرڤان بارزانی) سەرۆكوەزیرانی هەرێمی كوردستان، پێشوازی لە (د. میشێل دێسێر) باڵیۆزی وڵاتی نەمسا لە عێراق و شاندێكی یاوەری كرد.

لە دیدارێكدا باڵیۆزی نەمسا لە عێراق خۆشحاڵیی خۆی بە سەردانی هەرێمی كوردستان دەربڕی و، باسی لە پەیوەندییە دێرینەكانی نێوان هەرێمی كوردستان و وڵاتی نەمسا كرد و پشتگیریی خۆی بۆ پتەوتركردنی ئەو پەیوەندیانە لە هەموو بوارەكاندا پیشان دا.

هەروەها باسی لە بارودۆخی سیاسی و ئەمنیی ڕۆژهەڵاتی ناوەڕاست بە گشتی، عێراق و سووریا بە تایبەتی كرد و ئاماژەی بەوە دا كە وڵاتەكەی و ئەورووپا بە گشتی ڕێز لە خەباتی خەڵكی كوردستان و پێشمەرگە دەگرن كە بە خوێنی خۆیان ڕووبەڕووی تیرۆر بوونەتەوە و دەڤەرەكانیان لە مەترسیی تیرۆر پاراستووە. هەروەك بەردەوامیی هەوڵەكانی وڵاتەكەی لە ڕێگەی نەتەوە یەكگرتووەكانەوە و لەسەر ئاستی وڵاتان بۆ پشتگیرییكردنی هەرێمی كوردستان، دووپات كردەوە.

لای خۆیەوە، سەرۆكوەزیرانی هەرێمی كوردستان سوپاسی ئەو سەردانەی كرد و هیوای خواست لە سەردانەكان و هەوڵەكانی بۆ پتەوتركردنی پەیوەندییە دووقۆڵییەكان بەردەوام بێت. دواتر باسی بارودۆخی هەرێمی كوردستانی كرد، لەوانەیش قەیرانی دارایی و شەڕی دژەتیرۆر و حەواندنەوەی ژمارەیەكی یەكجار زۆری پەنابەر و ئاوارەی دەستی تیرۆر.

(نێچیرڤان بارزانی) لە بەردەوامیی قسەكانیدا هیوای خواست كە كۆمەڵگەی نێودەوڵەتی هاوكاریی زیاتری خەڵك و حكوومەتی هەێمی كوردستان و پێشمەرگە و ئاوارە و پەنابەران بكەن و سوپاسی حكوومەتی نەمساشی كرد بۆ ئەو هاوكاری و هەماهەنگییەی كە تا ئێستا لەم بوارانەدا كردوویەتی و هیوای بەردەوامیی ئەو هاوكاریانەی خواست.

 

تاوتووكردنی چەند تەوەر و بابەتێكی پەیوەندیدار بە تایبەتی بارودۆخی هەرێمی كوردستان و عێراق و ناوچەكە بە گشتی، لایەنێكی دیكەی دیدارەكە بوو.

26
نیسان

 (فازڵ میرانی)، سكرتێری مەكتەبی سیاسیی پارتی دیموكراتی كوردستان رایگەیاند: "لەبارەی رەوشی خورماتووەوە لەگەڵ یەكێتی لەسەر هێڵ بووینە و هێزی پێشمەرگە چووەتە خورماتوو، خۆ هەموومان ناچین كە كاك (مەحموود سەنگاوی) و (شێخ جەعفەر) و كاك (دكتۆر نەجمەددین) لەوێ بن، مانای ئەوەیە ئێمە لەوێین".

(میرانی) گوتیشی: "ئەو شەڕە، شەڕێكی نەخوازراوە، ئێمە نفوزی حەشدی شەعبیمان لە قوڵایی كوردستان پێ باش نییە، پێشتریش هەمان رامان هەبووە، ئومێد دەكەین بگەنە رێككەوتنێك كە خەڵكی خورماتوو بە كورد و توركمان و عەرەبەوە لە ئارامیدا بن، هەروەها حەشدی شەعبی لە خورماتوو دەرچێت".

سكرتێری مەكتەبی سیاسیی پارتی دیموكراتی كوردستان ئاماژەی بۆ ئەوەیش كرد: "رێككەوتنی پێشتری برادەرانی یەكێتی لەگەڵ حەشدی شەعبی، هەر ئەوە بووە، كە لە خورماتوو بچنە دەرەوە، سەرەڕای تێبینیمان لەسەر ئەو رێككەوتنانە، ئێستایش نەچووە و دەكرێت رێككەوتنێكی كۆنكرێتی بكرێت، خەڵكی خورماتوو بە هەموو پێكهاتەكەیەوە دووچاری ئەم بارودۆخە نەبنەوە كە لە چەند رۆژی رابردوو رووی دا".  

ئەمە لە كاتێكدایە، بڕیار بوو ئەمڕۆ شاندی كورد و حەشدی شەعبی لە پارێزگای كەركووك لەبارەی ئاڵۆزییەكانی خورماتووەوە كۆ ببنەوە، بەڵام بە هۆی ئامادەنەبوونی شاندی حەشدی شەعبییەوە، تا ئێستا كۆبوونەوەكە ئەنجام نەدراوە.

 

 

26
نیسان

دەقی پەیامی سەرۆك بارزانی لەبارەی ڕووداوەكانی خوورماتوو:

 

بەناوی خودای بەخشندە و میهرەبان
ڕووداوەكانی چەند ڕۆژی ڕابردووی شارۆچكەی خوورماتوو كە بووە هۆی گرژی و ناسەقامگیری لەم شارۆچەكەیە، جێگەی دڵگرانیی ئیمەیە. زۆر ئاشكرایە كە هەندێ كەس و لایەن كە پێشتریش سەرچاوەی گرفت و فیتنە بوونە، ئیستا لەژێر ناوی تازە دەستیان لە نانەوەی كێشە و فیتنەگێریدا هەیە و، دەیانەوێ شەڕ و دووبەرەكی لەنێو خەڵكی خۆجێی ناوچەكە و پێكهاتەكان دروست بكەن.
بەداخێكی زۆرەوە لە ئەنجامی ئەو ڕووداوانە ژمارەیەك هاووڵاتی و پێشمەرگە شەهید و بریندار بوون، سەرەخۆشی لە كەسوكاری شەهیدان دەكەم و هیوای چاكبوونەوەی برینداران دەخوازم. داوا لە بەرپرسانی هەرێم و فەرماندەكانی پێشمەرگە دەكەم كە لەگەڵ ئاقڵمەندانی ناو حەشد، ئەوانەی كە دژی فیتنەن، بكەونە دیالۆگ و ڕاوێژ، بۆ ئەوەی رێگە لەو كەسانە بگرن كە دەیانەوی ئاگری شەڕ و فیتنە هەڵگیرسێنن و ئاسوودەیی خەڵك و پێكهاتەكانی ناوچەكە بشێوێنن.
پێویستە هێزی پێشمەرگەی كوردستان بەرگری لە خەڵكی ناوچەكە بكات و رێگەیش لە هەموو دەستدریژییەك بۆ سەر ماڵ و موڵكی هاووڵاتیان و دانیشتوانی خوورماتوو بگرێت.
مسعود بارزانی
سەرۆكی هەرێمی كوردستان
26ـ 4ـ 2016

26
نیسان

لە دیداریدا لەگەڵ باڵیۆزی ژاپۆن لە عێراق، سەرۆكی هەرێمی كوردستان (مەسعوود بارزانی)، بڕیاری كردنەوەی كۆنسووڵخانەی ژاپۆن لە هەولێر بە هەنگاوێكی باش بۆ فراوانكردنی پەیوەندییەكانی هەردوولا وەسف كرد.

 

ئەمڕۆ سێشەممە 26ـ 4ـ2016 لە سەڵاحەدین (مەسعوود بارزانی) سەرۆكی هەرێمی كوردستان، پێشوازی لە (فۆمیۆ ئاوای) باڵیۆزی ژاپۆن لە عێراق كرد.
لە دیدارەكەدا باڵیۆزی ژاپۆن لە عێراق، (سەرۆك بارزانی)ـی لە بڕیار و ڕاسپاردەكانی كۆبوونەوەی وەزیرانی دەرەوە و داراییی گرووپی 7 لەبارەی پاڵپشتی و هاوكاریكردنی عێراق و هەرێمی كوردستان ئاگادار كردەوە؛ هەروەها ئەوەیشی بە (سەرۆك بارزانی) ڕاگەیاند كە، وڵاتەكەی بەنیازە كۆنسووڵخانەی خۆی لە شاری هەولێردا بكاتەوە و، سوپاسی هەماهەنگی و هاوكاریی لایەنە پەیوەندیدارەكانی هەرێمیشی كرد بۆ ئەو مەبەستە.
لە بەشێكی دیكەی دیدارەكەدا، باڵیۆزی ژاپۆن لە عێراق باسی ئەو هەنگاوانەی كرد كە وڵاتەكەی لە بواری هاوكاریی مرۆیی و گەشەپێدانی ئابووری بۆ عێراق لە دە ساڵی ڕابردوودا ناویەتی و، جەختیشی لە بایەخی هاوكاریكردنی هەرێمی كوردستان كردەوە.
لە بەرانبەردا (سەرۆك بارزانی) سوپاسی حكوومەت و گەلی ژاپۆنی كرد و، كردنەوەی كۆنسووڵخانەی ژاپۆنی لە هەولێر بە هەنگاوێكی باش بۆ فراوانكردنی پەیوەندییەكانی هەردوولا وەسف كرد.
لەبارەی بارودۆخی سیاسیی عێراقیش، باڵیۆزی ژاپۆن نیگەرانیی خۆی لەبارەی قەیرانی سیاسیی عێراق نیشان دا و، (سەرۆك بارزانی)ـیش باسی لەوە كرد كە هەرێمی كوردستان دەیەوێ ڕۆڵێكی ئیجابی لە چارەسەركردنی گرفتەكان بگێڕێت و جەختیشی لەوە كردەوە، كە ئەگەر یاسا و دەستوور پەیڕەو كرابا، قەیران و كێشەی سیاسیی  لە عێراقدا دروست نەدەبوو.
بارودۆخی مەیدانیی بەرەكانی شەڕی دژی تیرۆریستان و ئامادەكارییەكان بۆ ئازادكردنی مووسڵ و تاوتووكردنی قۆناغی دوای ئازادی مووسڵ، تەوەرێكی دیكەی ئەم كۆبوونەوەیە بوو.

25
نیسان

ئه‌مڕۆ دووشەممە 25ـ 4ـ 2016 لە سەڵاحەدین، (مەسعوود بارزانی) سەرۆكی هەرێمی كوردستان، پێشوازی لە (میشێل دیزێر) باڵیۆزی تازەی وڵاتی نەمسا بۆ عێراق و ئۆردون كرد.

لە دیدارەكەدا باڵیۆزی تازەی وڵاتی نەمسا بۆ عێراق و ئۆردون، سوپاسی (سەرۆك بارزانی) كرد بۆ ڕەخساندنی دیدارەكە و ڕایگەیاند، كە سڵاوی گەل و حكوومەتی نەمسای بۆ گەلی كوردستان و (سەرۆك بارزانی) هێناوە و، هاتووە بۆ ئەوەی كار بۆ قووڵتركردنی پەیوەندییەكان بكات و، بزانێ كە چۆن وڵاتەكەی بتوانێ زیاتر هاوكاریی گەلی كوردستان بكات.
(میشێل دیزێر) هەروەها ئەوەیشی بۆ (سەرۆك بارزانی) خستە ڕوو كە گەلی نەمسا سۆزێكی زۆری بۆ گەلی كوردستان هەیە و، ئاگاداری گیانفیداییی پێشمەرگە و خۆڕاگریی خەڵكی كوردستانن لەبەرانبەر تەحەدیاتەكاندا، پێزانینیشی هەبوو بۆ میوانداریی و دڵفراوانیی گەلی كوردستان كە بوونەتە پەناگەی سەدانهەزار ئاوارە و لێقەوماو.

لە بەرانبەردا (سەرۆك بارزانی) هیوای سەركەوتنی بۆ باڵیۆزی تازەی نەمسا لە عێراق و ئۆردون خواست و، وێڕای ئاماژەدان بە پەیوەندییە مێژووییەكانی كوردستان و نەمسا، ستاییشی گەلی نەمسای كرد كە دۆست و پشتیوانی گەلی كوردستانن و پێشوازییشی كرد لە قووڵتربوونی پەیوەندییەكانی نێوان هەردوولا.
(سەرۆك بارزانی) لە درێژەی گوتەكانیدا باسی لە شەڕی داعش و ئەو تەحەدیاتانە كرد كە ڕووبەڕووی گەلی كوردستان بوونەتەوە.

پەیوەست بە شەڕی داعش و تیرۆر (سەرۆك بارزانی) جەختی لەوە كردەوە كە شەڕی داعش، پێویستی بە هەماهەنگی و هاوكاریی جیددیی كۆمەڵگەی نێودەوڵەتییە و شكستدانی داعشیش تەنیا ڕەهەندی سەربازی نییە، بەڵكو پێویستە لە ڕووی فیكری و ئابووری و سیاسییشەوە داعش و تیرۆر تێك بشكێندرێت.

 

هەر لەم دیدارەدا باس لە ئامادەكارییەكان بۆ ئازادكردنی مووسڵ و پەیوەندییەكانی نێوان بەغدا و هەرێم و پاشه‌ڕۆژی گەلی كوردستان كرا و، بیروڕا لەبارەی دواپێشهاتە سیاسییەكانی توركیا و سووریا ئاڵوگۆڕ كرا.

25
نیسان

به‌ مه‌به‌ستى پيرۆزبايى كردن له‌ پارتى چاكسازى و پێشكوتووى توركمان به‌ بۆنه‌ى 11 ساڵه‌ى دامه‌زراندنى شاندێكى باڵاى پارتى ديموكراتى كوردستان كه‌ پێكهاتبوون له‌به‌رێز فازڵ ميرانى سكرتێرى مه‌كته‌بى سياسى و كاكه‌مين نه‌جار ئه‌ندامى مه‌كته‌بى سياسى و سه‌رۆكى ئه‌نجومه‌نى سه‌ركردايه‌تى پارێزگاى هه‌ولێر و ئه‌ندامانى ئه‌نجومه‌ن . سه‌ردانى باره‌گاى مه‌كته‌بى سياسى پارتى چاكسازى و پێشكه‌وتووى توركمانيان كرد و له‌لايه‌ن عبدالقادر بازرگان سكرتێر و ئه‌ندامانى مه‌كته‌بى سياسى و سه‌ركردايه‌تى به‌گه‌رمى پێشوازى كران . به‌رێز فازل ميرانى به‌ناوى مه‌كته‌بى سياسى و سه‌ركردايه‌تى پارتى پيرۆزبايى ئاراسته‌ى پارتى چاكسازى و پێشكه‌تووى توركمان كرد و هيواى خواست له‌ سايه‌ى كه‌شى ئارام و ئازادى كوردستان پارت و لايه‌نه‌ سياسيه‌كان و پێكهاته‌ جياوازه‌كان به‌ ئازادى يادى دامه‌زراندن و بۆنه‌كانى تايبه‌ت به‌ خۆيان بكه‌نه‌وه‌ . رێزدار ميرانى رايگه‌ياند خه‌بات و قوربانيدانى گه‌لى كوردستان و شۆرشه‌كانى بۆ ئه‌وه‌ بووه‌ كوردستان وه‌ك هه‌ميشه‌ مه‌ڵبه‌ندى پێكه‌وه‌ ژيان و يه‌كتر قه‌بوڵكردن بێت . خۆش به‌ختانه‌ ئه‌مرۆ له‌ سايه‌ى سه‌رۆك مسعود بارزانى و پێشمه‌رگه‌ قاره‌مانه‌كانى كوردستان ته‌واوى ئاين و ئاينزا و نه‌ته‌وه‌ و پێكهاته‌كان به‌ ئاشتى له‌ كوردستان ده‌ژين . ئه‌مرۆش كوردستان بۆته‌ نمونه‌يه‌كى كه‌م وێنه‌ له‌ ناوچه‌كه‌ له‌ پێكه‌وه‌ ژيان و يه‌كتر قه‌بوڵكردن كه‌ مايه‌ى دڵخۆشى و خۆشحاڵى ئێمه‌ى پارتى ديموكراتى كوردستانه‌ كه‌ هه‌ر له‌ سه‌ره‌تاى دامه‌زراندنييه‌وه‌ پارتى خه‌باتى بۆ پێكه‌وه‌ ژيان و يه‌كتر قه‌بوڵكردن كردوه‌ . ئه‌مرۆش به‌رهه‌مى ئه‌و خه‌بات و قوربانيدانه‌ ئه‌م جۆره‌ ياد و بۆنه‌ تايبه‌تانه‌يه‌ كه‌ پارتى چاكسازى و پارت و لايه‌نه‌كانى تر به‌ ئازادى كارى رێكخراوه‌ى خۆيان ده‌كه‌ن و يادى دامه‌زراندنيان ده‌كه‌نه‌وه‌ . دواتر عبدالقادر بازرگان به‌ ناوى پارتى چاكسازى و پێشكه‌وتووى توركمان سوپاسى سه‌رۆك و سه‌ركردايه‌تى پارتى ديموكراتى كوردستانى كرد بۆ په‌يامى پيرۆزباييان و ته‌ئكيدى له‌ په‌يوه‌ندى دۆستانه‌ى نێوان پارتى ديموكراتى كوردستان و پارتى چاكسازى پێشكه‌تووى توركمان كرده‌وه‌ .

24
نیسان

ئەمڕۆ چل و دووهەمین ساڵوەگەری بۆردوومانی (قەڵادزێ)یە لەلایەن فڕۆکەکانی حکوومەتی بەعسی ئەو سەردەمەی بەغداوە. 
لەم ڕۆژەدا چەندین قوتابی و مامۆستای زانکۆی، هەروەها هاووڵاتیانی قەڵادزێ و دەوروبەی شەهید کران.
پێویستە ئەم بۆنەیە ساڵانە بەرز ڕاگیرێت و لەپاڵ کارەساتەکانی تر کە لە لایەن دوژمنانی کوردەوە ئەنجام دراون، لە بیر نەکرێت.
سڵاو لە گیانی پاکی شەهیدانی بۆردوومانەکەی قەڵادزێ و گشت شەهیدانی کورد و کوردستان.
سڵاو لە ڕۆژی 24-4-1974

24
نیسان

  (مەسعوود بارزانی)سەرۆکی هەرێمی کوردستان، داوای گەرەنتی پاراستنی ژیانی خەڵکی مووسڵ دەکات دوای نەمانی داعش و، چەندان جار دووپاتی کردووەتەوە کە، دەبێت خەڵکی ناوچەکە خۆیان بڕیار لەسەر چارەنووسی خۆان بدەن. پێکهاتەی پارێزگاکەیش داوا دەکەن مووسڵ بکرێت بە چەند پارێزگایەیەک و بەشێکی لە چوارچێوەی هەرێمی کوردستاندا مامەڵەی لەگەڵ بکرێت.

ڕوانگای (سەرۆک بارزانی) پێوەست بە پاشەڕۆژی پارێزگای نەینەوا وایە کە، دەبێت پێکهاتەکانی ئەو شارە جارێکی دیکە نەکەونەوە بەردەم هێرشی هاوشێوەی داعش، بۆیە دەکرێت بیر لە دروستکردنی چەند پارێزگایەکی بکرێتەوە، وەک گەرەنتیێک لە دووبارەنەبوونەوەی جینۆساید و هەموو ئەو مەینەتیانەی دووچاری بوونەتەوە؛ پێشووتریش لەگەڵ نوێنەر و کەسایەتیانی ئێزدیدا کۆبوونەوەی کرد، (بارزانی) تێیدا رایگەیاند، کە کار دەکەن بۆ ئەوەی شنگال بکرێتە پارێزگا و راستەوخۆ لەلایەن شنگالییەکانەوە ئیدارە بدرێت.

"کلد و ئاشوور لە قۆناغی دوای داعش ترسیان هەیە"
(ڕۆمیۆ هەکاری) سکرتێری حزبی دیموکراتی بەیت نەهرێن، باوەڕی وایە، کورد دەبێت دەوری زیاتری هەبێت لە مووسڵدا، بەتایبەتی دەشتی نەینەوا، ئەمەیش بۆ پاراستنی ئاشوورییەکان لە دەشتی نەینەوا گرینگە.

(هەکاری) وای بە ماڵپەری فەرمیی پارتی دیموکراتی کوردستانی راگەیاند کە، "دەبێت پێکهاتەکان هێزی تایبەتی خۆیان هەبێت بۆ پاراستنی ناوچەکانیان و، دەبێت سەرکردایەتیی سیاسیی کوردستان بەتایبەتی (سەرۆک بارزانی) دەورێکی باڵای هەبێت بۆ یارمەتیدان و گەشەپێدانی ئەو هێزانەی کە پێیان دەگوترێت هێزی ئاشوورییەکان، کە دوو ساڵ دەبێت لە دەشتی نەینەوا هەن؛ هەڵبەتە ئەمە دوای بڕیاری (سەرۆک بارزانی) بووە و ئێستا ئەوان پارێزگاری لە ناوچەکانی خۆیان دەکەن، بۆیە دەبێت وەک ڕمزێک سەیری ئەم هێزانە بکرێت بۆ ئەوەی دەوری باڵایان هەبێت لەگەڵ هێزی پێشمەرگەدا".

ئەو نەیشاردەوە کە: "کلد و ئاشوور لە قۆناغی دوای داعش ترسیان هەیە لە دەشتی نەینەوا، پێمان وایە دەبێت پاشەڕۆژی ئاشوورییەکان لە دەشتی نەینەوا پارێزراو بێت. هەربۆیەشە پێمان وایە دەبێ کورد دەوری باڵای هەبێت لە بەرگریکردن و پاڵپشتیی مافەکانی ئێمە، چونکە ئێمە لەمێژە پشتگیریی شۆڕشی ڕزگاریخوازی کوردستانمان کردووە، کەواتە خەباتی هاوبەشمان هەیە. هەڵبەتە بۆ ئێمە زۆر گرینگە (بارزانی) دەڵێت، دەبێت پێکهاتەکانی مووسڵ بپارێزرێن."

(ڕۆمیۆ هەکاری) جەختی کردەوە، پێش سەرهەڵدانی داعشیش لە ئەدای ئیدارەدانی مووسڵ ڕازی نەبووە، چونکە وەک ئەو دەڵێ، حکوومەتی ناوەند و حکوومەتی خۆجێی، دەورەی خراپیان هەبووە لە دەشتی نەینەوادا و دەیانگوت سەر بە هەرێمی کوردستانن، لە هەرێمی کوردستانیش بە هەمان شێوە؛ "ئێمە و پێکهاتەکانی دیکەیش، کەوتبووینە نێوان دوو لایەنەوە، کار گەیشتبووە ئەوەی ناوچەکەمان بێ خزمەتگوزاری مابووەوە، بۆیە دەبێت ئەمە نەمێنێت لە دوای نەمانی داعش، دەبێت گەرەنتیمان بکرێت".

(هەکاری) جەختیشی کردەوە: "گرینگە ئەو ناوچانە ئیدارەی تایبەتی خۆیان هەبێت و، هێزی پێشمەرگەی کوردستانیش هاوکارو پارێزەری ئەو ناوچانە بێت."


"پارێزگایەکی سەر بە هەرێم، گەرەنتیی مانەوەمانە"
شەبەک کە پێکهاتەیەکی دیکەی سنووری دەشتی نەینەوا و، (سالم شەبەک) کە نوێنەرایەتییان دەکات لە ئەنجوومەنی نوێنەرانی عێراقدا، ڕاگەیاند: "لە ڕووی ئیدارییەوە ئێمە نامانەوێت جارێکی دیکە بکەوینەوە بن دەستی مووسڵ، چونکە دەزانین هەمان ئەقڵیەتی داعش بەسەرماندا دووربارە دەبێتەوە، بۆیە پشگیریی لە جەنابی (سەرۆک بارزانی) دەکەین لەوەی دەبێت مووسڵ گەرەنتی بێت بۆ پێکهاتەکانی ئەو شارە، چونکە لەناو مووسڵدا ئێزدی، مەسیحی، شەبەک و کاکەیی هەن، خۆ ناکرێت ئەم پێکهاتانە هەر ڕۆژە و بە دەست کەسانێکەوە قەتڵوعام بکرێن."

(سالم شەبەک) وای بە ماڵپەڕی فەرمیی پارتی دیموکراتی گوت کە، "خۆم پرۆژەیەکم داوەتە (سەرۆک بارزانی) کە لە چەند خاڵێک پێک‌دێت. تێیدا هاتووە کە ناوچەی شەبەک و کاکەیی و ئێزدی و مەسیحییەکان پارێزگایەکیان بۆ جیا بکرێتەوە و خۆیان ئیدارەی خۆیان بدەن، بەڵام سەر بە هەرێمی کوردستان بێت؛ لەو ڕووەیشەوە ئاگاداری نەتەوە یەکگرتووەکان و ئەمەریکایشمان کردووەتەوە کە ناکرێت جارێکی دیکە پێکهاتەکانی ئەو شارە لەناو ببرێن."

نوێنەری کوردانی شەبەک بۆ ماڵپەری فەرمی پارتی دیموکراتی کوردستانی ئاماژەیشی دا: "(سەرۆک بارزانی) باش درکی بەو راستییە کردووە کە جارێکی دیکە ناکرێت مامەڵەی لەناوبردن و بە چاوی سووک سەیری پێکهاتەکانی مووسڵ بکرێت؛ هەربۆیە گرینگە ئەو شارە بکرێتە چەند پارێزگایەک، بۆ ئەوەی جارێکی دیکە ئەقڵیەتی داعش نەتوانێت بە ناوی شارەکەوە قەتڵوعامی خەڵک بکات، ئاخر ئەوەی ئێمە لێی دەترسین ئەوەیە، هیچ گەرەنتییەکمان نییە لە دوای داعش چی دیکەمان بەسەر دێت."

شنگال و دەورووبەری، کە بە هۆی تێدا مانەوە لە نێوان پەراوێزخستنی لە لایەن بەغداوە و، دەستڕانەگەیشتنی هەرێمی کوردستان پێی، وەک پێویست خزمەتی پێ نەکرا، بە هەڵتۆقینی ڕێکخراوی تیرۆریستانی داعشیش، ئەو پێکهاتە ڕەسەنەی کورد، دووچاری جینۆساید بوونەوە و، هێشتایش برینەکانیان ساڕێژ نەبوون، پاشەڕۆژی ئەو ناوچەیەیش یەکێکە لە پرسە هەرەگەرمەکانی پاش ڕزگارکردنەوەی مووسڵ و، (د.ماجدی شنگالی) کە نوێنەری کوردانی ئێزدییە لە ئەنجوومەنی نوێنەرانی عێراق بۆ ماڵپەڕی فەرمیی پارتی دیموکراتی کوردستان گوتی: "دەبێت جارێکی دیکە شنگال کارەساتی وای بەسەر نەیەتەوە، بۆ ئەوەی شنگالییەکانیش لەو کارەساتە دوور بن، دەبێت راستەوخۆ بە ئیدارەی هەرێمی کوردستانەوە ببەسترێتەوە.

"قەبووڵ ناکەین جارێکی دیکە ئەقڵیەتی شۆڤێنی و تاکڕۆیی، حوکمی شنگال بکاتەوە"
(ماجد شنگالی) گوتیشی: "هێزی پێشمەرگەی کوردستان پارێزەری ناوچەکانن و دەبێت ئەو هێزە ببێتە قەڵغانی پارێزگاریکردن لەو ناوچانە؛ ڕاستییەکەی ئێمە قەبووڵ ناکەین جارێکی دیکە ئەقڵیەتی شۆڤێنی و تاکڕۆیی، دووبارە حوکمی شنگال بکاتەوە، ئێستا کار دەکەین بۆ ئەوەی کە شنگال بکرێت بە پارێزگایەکی سەربە هەرێمی کوردستان".


هەرچی پێوەندی بە پاشەڕۆژی ئەو ناوچە کوردستانیانەی دەرەوەی ئیدارەی هەرێمەوە هەیە، کە ئێستا پێشمەرگە دەیانپارێزێ و، پێکهاتەی جیا لێیاندا نیشتەجێن، بووەتە پرسێک لە ئەنجوومەنی پارێزگای نەینەوادا و، لەم ڕووەوە (غەزوان داوودی) ئەندامی ئەنجوومەنی پارێزگاکە دەڵێ: داوامان کردووە دەشتی نەینەوا و شنگال بکرێتە دوو پارێزگا و بخرێتە سەر هەرێمی کوردستان، چونکە پێش هاتنی داعشیش بە هەزاران مەسیحی و کوردی شەبەک و ئێزدی، کوژراون؛ دوای هاتنیشی، کوشتنی ئەو خەڵکە بێتاوانانە سێ بەرانبەر زیادی کردووە، ئاخر دنیایش بینی کە جینۆساید کران، ئێستایش نازانرێت دوای داعش چیمان بەسەر دێت."

ئەو ئەندامەی ئەنجوومەنی پارێزگای نەینەوا گوتیشی: "ئێمە داوامان لە (بارزانی) کردووە ژیانی خەڵکی مووسڵ نەکەوێتە مەترسییەوە، بۆیە یەکێک لە داواکانمان ئەوە بووە کە بخرێینە سەر هەرێمی کوردستان و لە کوردستانەوە ئێدارەمان بکرێت و پێشمەرگە پارێزگاریمان لێ بکات".

 

گوتیشی: "پێکهاتەکانی مووسڵ زۆر زەرەمەند بوون لە ئیدارەکەی مووسڵ، بۆیە دەبێت گەرەنتی هەبێت بۆ ئەوەی جارێکی دیکە ئەو پارێزگایە وەک ئێستا ئیدارە نەدرێت ".

پەڕەى 39 لەکۆى 41 پەڕەدا