YJ Dailynews - шаблон joomla Книги

هه‌واڵ (572)

10
تەمموز

 

ڕۆژی یەكشەممە 9ـی 7ـی 2017 لە سەلاحەددین بەڕێز مەسعود بارزانی سەرۆكی هەرێمی كوردستان پێشوازی لە برێت مەكگورك نوێنەری تایبەتی سەرۆكی ئەمەریكا لە هاوپەیمانێتیی شەڕی داعش و شاندێكی یاوەری كرد كە پێكهاتبوو لە دۆگڵاس سڵیمان باڵیۆزی ئەمەریكا لە عێراق و هێنری هاگارد كونسوڵی گشتیی ئەمەریكا بە وەكالەت لە هەولێر و ژمارەیەك ڕاوێژكاری باڵیۆزخانەی ئەمەریكا لە عێراق.


لە دیدارەكەدا بارودۆخی مەیدانیی بەرەكانی شەڕی دژی تیرۆریستانی داعش لە موسڵ و قۆناغی دوای داعش و تەحەددیاتەكان خرایە بەر باس و گفتوگۆ و نوێنەری تایبەتی سەرۆكی ئەمەریكا لە هاوپەیمانێتیی نێودەوڵەتیی شەڕی دژی داعش ڕۆڵی هێزی پێشمەرگەی كوردستان و هەماهەنگی لەگەڵ هێزەكانی هاوپەیمانان و سوپای عێراقی لە تێكشكاندنی تیرۆریستان و ئۆپەراسیۆنی ئازادكردنی موسڵ بەرز نرخاند و جەختیش لەوە كرایەوە كە بوونی هەماهەنگیی كەموێنە لە نێوان پێشمەرگە و هێزەكانی هاوپەیمانان سەركەوتنی مەزنی لێ كەوتووەتەوە.

هەر لەو دیدارەدا بارودۆخی سیاسی و ئەمنیی سووریا و هەوڵەكانی ئەمەریكا و هێزەكانی تر بۆ ئازادكردنی ڕەققە تاوتوێ كرا و نوێنەری تایبەتی سەرۆكی ئەمەریكا لە هاوپەیمانێتیی نێودەوڵەتیی شەڕی دژی داعش سوپاسی تایبەتی ئەمەریكای ئاراستەی سەرۆك بارزانی كرد كە هەرێمی كوردستان ئاسانكارییەكی زۆری بۆ تێپەڕبوونی هاوكاریی مرۆیی بۆ خەڵكی لێقەوماوی سووریا ئەنجام داوە.

لە بەشێكی دیكەی ئەو دیدارەدا بە دوورودرێژی هەردوولا بیروڕای خۆیان لەبارەی ڕیفراندۆم و هەنگاوەكانی گەلی كوردستان بۆ سەربەخۆیی ئاڵوگۆڕ كرد و جەختیشیان لەوە كردەوە كە پەیوەست بەم بابەتە هەردوولا لە پەیوەندی و ڕاوێژی بەردەوامدا بن.

09
تەمموز

 

 لەم دوو ڕۆژەی ڕابردوو دوای شەهید کردنی مامۆستا ئاینیەکەی شاری قەڵادزێ . چەند ماڵپەڕ و پەیجێک هەواڵێکی هەڵبستراوی دوور لە ڕاستی بڵاو دەکەنەوە کە گوایە پاسەوانێکی بەڕێز کاکەمین نەجار ئەندامی مەکتەبی سیاسی پارتی دیموکراتی کوردستان دەستی هەبووە لە شەهید کردنی ئەو مامۆستا بەڕێزەی کە ڕۆژی هەینی لە قەڵادزێ شەهید کراوە .ئێمە لێرەوە ڕای دەگەیەنین ئەم هەواڵە دوورە لە ڕاستی و هیچ بنەمایەکی نییە و هیچ پاسەوانێکی بەڕێز کاکەمین نەجاڕ پەیوەندی بەم بابەتەوە نییە . 

نوسینگەی ڕۆژنامەوانی کاکەمین نەجاڕ 
 ئەندامی مەکتەبی سیاسی پارتی دیموکراتی کوردستان

09
تەمموز

 

ڕۆژی شەممە 8ـی 7ـی 2017 لە پیرمام یەكەم كۆبوونەوەی ئەنجوومەنی باڵای ڕیفراندۆم بە سەرپەرشتیی مەسعود بارزانی سەرۆكی هەرێمی كوردستان و بەشداریی نوێنەری پارتە سیاسی و پێكهاتە نەتەوەیی و ئایینییەكانی ئەندام لەو ئەنجوومەنە بەڕێوە چوو.

دوای تاوتوێكردنی بارودۆخی سیاسی و دوا پێشهاتەكان و هەڵسەنگاندنی هەڵوێستی كۆمەڵگەی نێودەوڵەتی و پڕۆسەی سیاسیی ناوخۆی هەرێم، بڕیار لەسەر ئەم خاڵانەی خوارەوە درا:

یەكەم: پابەندبوونی بەشداربووانی كۆبوونەوەكە بە بڕیار و ڕاسپاردەكانی كۆبوونەوەی 7ـی حوزەیرانی 2017 سەبارەت بە دیاریكردنی ڕۆژی 25ـی ئەیلوولی 2017 بۆ بەڕێوەچوونی ڕیفراندۆم لە هەرێمی كوردستان و ناوچە كوردستانییەكانی دەرەوەی ئیدارەی هەرێم و چارەسەركردنی پڕۆسەی سیاسیی هەرێم و هەوڵدان بۆ باشتركردنی بژێوی ژیانی خەڵك.

دووەم: بۆ هەنگاونانی پڕاكتیكی لە ئامادەكاری لەسەرجەم بوارەكانی ڕیفراندۆم هەیكەلیەتی كاری ئەنجوومەنی باڵای ڕیفراندۆم و كۆمیتە فەرعییەكان دیاری كرا.

سێیەم: حكوومەتی هەرێمی كوردستان بە هەموو توانایەكەوە بە هەماهەنگی لەگەڵ كۆمیسیۆنی باڵای هەڵبژاردن و ڕاپرسی لە هەرێمی كوردستان و لایەنە پەیوەندیدارەكان، پێداویستییەكانی بەڕێوەچوونی ڕیفراندۆم فەراهەم دەكات.

ئەنجوومەنی باڵای ڕیفراندۆم
 
23
حوزەیران

 

بەئامادەبوونی بەرێز ( كاكەمین نەجاڕ ) سەرۆكی ئەنجوومەنی سه‌ركردایه‌تی پارێزگای هەولێرو بەرێز ( بڵند اسماعیل ) بەرپرسی لقی 16ی پارتی دیموكراتی كوردستان و هه‌ڤاڵ (سولحی مجید)ئه‌ندامی ئه‌نجومه‌نی سه‌ركردایه‌تی و كارگێڕانی لق و ژمارەیەكی زۆر لەخانەوادەو كەس و كاری سەربەرزی شەهیدان .

هاوكاری لقی 16 ی پارتی دیموكراتی كوردستان درایە خانەوادەی ( 110 ) شەهیدی سەربەرزی گەلەكەمان كە لەشەڕی بەرگری لەخاك و نیشتمان لە دژی تیرۆرستانی داعش گیانی خۆیان بەنیشتمانەكەمان بەخشی .

23
حوزەیران

 

ئه‌مڕۆ 22/6/2017 مەسرور بارزانی راوێژکاری ئەنجوومەنی ئاسایشی هه‌رێمی كوردستان پێشوازیی لە شاندێکی باڵای یەکێتی ئەوڕوپا بە سەرپەرشتیی پاتریک سیمۆنێت باڵیۆزی یەکێتی ئەوروپا لە عێراق کرد. لەم کۆبوونەوەیەدا کە چەندین بالیۆز و کۆنسولی وڵاتانی ئەوروپا ئامادەی بوون، دوا پێشهاتەکانی ناوچەکە و بەرەنگاربوونەوەی تیرۆر گفتوگۆیان لە سەر کرا.

هەر لەم کۆبوونەویەدا پرسی ریفراندۆمی هەرێمی کوردستان خرایە بەر باس و شاندی ئەوروپی جەختیان لە سەر بنەمای گفتوگۆ و دانوستان لە نێوان هەولێر وبەغدا کردەوە لە پێناو چارەسەریی گشت کێشەکان و لێکتێگەیشتنی زیاتر.

لە بەرامبەردا مەسرور بارزانی ئاماژەی بە ئەوەدا، کە گەلانی کوردستان بە نیازن بە شێوازێکی دیموکراتیک خواستی خۆیان بە رێگەی ریفراندۆمەوە بۆ کۆمەڵگای نێودەوڵەتی ئاشکرا بکەن و هەرێمی کوردستانیش رێگەی گفتوگۆ و دانوستان دەگرێتە بەر بۆ ئەوەی خواستی هاووڵاتیانی کوردستان جێبەجێ بکرێت.

راوێژکاری ئەنجوومەنی ئاسایش دووپاتیشی کردەوە، کە هەوڵی فراوانتر دەدرێت تاکو نیگەرانیەکان لە دەڤەرەکەدا بڕەوێندرێت و کۆمەڵگای نێودەوڵەتی دڵنیا بێت، کە کوردستانێکی سەربەخۆ فاکتەرێکی کاریگەرتر دەبێت لە جەنگی دژ بە تیرۆر و توندڕۆیی و بەشدارێکی کاراش دەبێت لە پێناو سەقامگیری و ئاشتەوایی لە دەڤەرەکەدا.

23
حوزەیران

 

 سه‌رۆكی هه‌رێمی كوردستان كاردانه‌وه‌ی وڵاتانی هه‌رێمیی و ئه‌مریكا و ئه‌وروپاش به‌ شێوه‌یه‌ك ده‌بینێت كه‌ دژی ئه‌و مافه‌ی كورد نیین و ده‌ڵێت: "نه‌مبیستووه‌ هیچ وڵاتێكی ئه‌وروپی یان ئه‌مریكا دژی ریفراندۆم قسه‌ بكه‌ن له‌وانه‌یه‌ گوتبێتیان كاته‌كه‌ گونجاو نییه‌ یان له‌وانه‌یه‌ ریفراندۆمه‌كه‌ كێشه‌ی زیاتر به‌دوای خوێدا بێنێت، ته‌نانه‌ت توركیا و ئێرانیش نه‌یان گوتووه‌، دژین و نابێت. ئه‌مه‌ مافێكی سرووشتی هه‌موو میلله‌تێكه‌، چ گوناهێكه‌ و چ تاوانێكه‌ كه‌ میلله‌تێك بێت به‌ ئاشتیانه‌ و دیموكراسیانه‌ گوزارشت له‌ ماف و چاره‌نووسی خۆی بكات؟، ئامانجمان ئه‌وه‌یه‌ ده‌مانه‌وێت رێگه‌ له‌ كاره‌ساتی گه‌وره‌ بگرین، ئه‌گه‌ر خه‌ڵكێك پێی وایه‌ ئه‌مه‌ ده‌بێته‌ هۆی ئه‌وه‌ی كاره‌ساتێكی گه‌وره‌ رووبدات، له‌ راستیدا خۆی به‌ نه‌بوونی ئه‌مه‌ كێشه‌ی گه‌وره‌ رووده‌دات، ئه‌و وڵاتانه‌ باسی مافی مرۆڤ و مافی گه‌لان ده‌كه‌ن، ئه‌ی ئه‌و پره‌نسیپانه‌یان له‌ كوێیه‌، ئایا كه‌ دێته‌ سه‌ر كێشه‌ی كورد هه‌مووی ون ده‌بێت؟".

ره‌وشی ئێستا 
رۆژنامه‌نووسێكی كه‌ناڵی فرانس 244 به‌و پرسیارانه‌ ده‌ستی به‌ گفتوگۆیه‌كی چر و پڕ كردووه‌ له‌گه‌ڵ بارزانی و ده‌نگدانه‌وه‌ی بڕیاری ریفراندۆم بووه‌ته‌ باسێكی هێنده‌ گه‌وره‌و فراوانی جیهانیی ئه‌ویش زۆربه‌ی پرسیاره‌كانی له‌ سه‌رۆكی هه‌رێمی كوردستان بۆ ئه‌و پرسه‌ ته‌رخان كردووه‌، چونكه‌ رۆژی 7/6/2017 زۆرینه‌ی لایه‌نه‌ سیاسییه‌كانی كوردستان بڕیاری ریفراندۆمی سه‌ربه‌خۆیی كوردستانیاندا، كه‌ له‌ 25/9/2017 ئه‌نجام بدرێت، به‌ سه‌رپه‌رشتی بارزانی كۆببوونه‌وه‌. 
 له‌و دیداره‌دا پرسی پاش ده‌ره‌نجامی ریفراندۆم و كێشه‌ ی ناوچه‌ جێ ناكۆكه‌كان و شه‌ڕی مووسڵ و ره‌ققه‌ و كردنه‌وه‌ی رێڕه‌وی وشكایی ئێران له‌ عێراقه‌وه‌ بۆ سووریا و پۆستی سه‌رۆكایه‌تی هه‌رێم و هه‌ڵبژاردنی داهاتووی په‌رله‌مانی كوردستان و پرسی كورد له‌ پارچه‌كانی دیكه‌ی كوردستانی له‌گه‌ڵ سه‌رۆكی هه‌رێمی كوردستان باسكردووه‌و چه‌ندین پرسیاری له‌باره‌وه‌ كردووه‌.

23
حوزەیران

 

ڕۆژی پێنجشەممە 22ـی 6ـی 2017 لە سەلاحەدین بەڕێز مەسعود بارزانی سەرۆكی هەرێمی كوردستان لەگەڵ پاتریك سیمۆن نوێنەری یەكێتیی ئەوروپا لە عێراق و شاندێكی باڵیۆز و كونسوڵ و نوێنەری وڵاتانی ئەندام لە یەكێتیی ئەوروپا كۆبۆوە كە پێكهاتبوو لە باڵیۆزانی بەلجیكا و پۆڵەندا لە عێراق و بەرپرسی ئۆفیسی یەكێتی ئەوروپا لە هەولێر و نوێنەرانی باڵیۆزخانەی ئیتالیا و ئیسپانیا لە عێراق و كۆنسوڵەكانی ئەڵمانیا و فەڕەنسا و هۆڵەندا و نوێنەرانی كونسوڵخانەی بریتانیا و چیك و ڕۆمانیا لە شاری هەولێر.


لە سەرەتای كۆبوونەوەكەدا نوێنەری یەكێتیی ئەوروپا وێڕای ئاماژەدان بە كۆبوونەوەی ڕۆژی 19ـی 6ـی 2017ـی وەزیرانی دەرەوەی یەكێتیی ئەوروپا لە شاری بروكسێل پەیامی یەكێتیی ئەوروپای بۆ سەرۆك بارزانی و ئامادەبووانی كۆبوونەوەكە خستەڕوو كە تێیدا یەكێتیی ئەوروپا پشتیوانیی خۆی بۆ هەرێمی كوردستان و عێراق دووپات كردووەتەوە لە بەرانبەر تەحەدیات و كێشەكاندا. هەروەها ستاییشی ڕۆڵ و بەشداریی گەلی كوردستانیان كردووە لە شەڕی دژی تیرۆر و حەواندنەوەی ئاوارەكان و پێزانینیشیان بۆ قارەمانێتی و قوربانیدانی هێزی پێشمەرگە دووپات كردووەتەوە. نوێنەری یەكێتیی ئەوروپا لە عێراق ئەوەیشی باس كرد كە پەیوەندییەكانی نێوان هەولێر و بەغدا بۆ یەكێتیی ئەوروپا جێگەی بایەخە و بە پێویستیشی زانی كە پێكهاتەكانی عێراق بۆ شكاندنی تیرۆر و چەسپاندنی ئاشتی یەكگرتوو بن و تەركیز لەسەر بابەتە هاوبەشەكان بكەن و خۆیان لە بڕیاری یەكلایەنە بپارێزن و چارەسەركردنی كێشە هەڵواسراوەكان و چارەنووسی ناوچە جێناكۆكەكان لە ڕێگەی ئاشتی بێت چونكە ئەمە لە بەرژەوەندیی عێراق و هەرێمە. نوێنەری یەكێتیی ئەوروپا هێمای بە بڕگەیەكی تری پەیامی یەكێتی ئەوروپادا بۆ لایەنە سیاسییەكانی هەرێم كە بۆ زاڵبوون بەسەر تەحەدیاتە سیاسییەكان و پڕۆسەی چاكسازی و هەڵبژاردنەكان، ناكۆكییەكانیان وەلا بنێن و ڕێكبكەون. نوێنەری یەكێتیی ئەوروپا ئەوەیشی خستەڕوو كە مەبەست لە سەردانیان بۆ كوردستان گەیاندنی پەیامی یەكێتی ئەوروپا و تێگەییشتنی باشترە لە بڕیار و داواكارییەكانی هەرێم.

هەر لەو كۆبوونەوەیەدا كە بە ئامادەبوونی نوێنەرانی پارتی دیموكراتی كوردستان و یەكێتیی نیشتیمانیی كوردستان و یەكگرتووی ئیسلامیی كوردستان و سكرتێری حزبی سۆسیالیست دیموكراتی كوردستان و نوێنەرانی حزبی شیوعی و بزووتنەوەی ئیسلامی و حزبی زەحمەتكێشان و نوێنەری حزبە توركمان و مەسیحییەكانی كوردستان ئامادەی بوون، سەرۆك بارزانی لە وتەیەكدا بە وردی ئەو هۆكارانەی شی كردەوە كە هانی گەلی كوردستانی داوە بەرەو ڕیفراندۆم هەنگاو بنێت.

سەرۆك بارزانی ئاماژەی بە سەرەتاكانی دروستبوونی دەوڵەتی عێراق دا كە تێیدا گەلی كوردستان بە مەرجی شەراكەت بڕیاری ژیان لە چوارچێوەی دەوڵەتی عێراقی دا بەڵام لە قۆناغی 1921 هەتا 2003 نەك تەنیا شەراكەت جێبەجێ نەكرا بەڵكو چەمكی هاووڵاتیبوونی گەلی كوردستانیش جێبەجێنەكرا و لەو ماوەیەدا 4500 گوندی كوردستان وێران كرا و 180 هەزار ڕۆڵەی كورد بەر پڕۆسەی ئەنفال كەوتن و بێ سەروشوێن كران و دوازدە هەزار گەنجی فەیلی و هەشت هەزار بارزانی بێسەروشوێن كران و كوردستانیش كیمیاباران كرا و هەڵەبجە بووە هێمای ئەو تاوانە. سەرۆك بارزانی جەختی لەوە كردەوە كە ئەو نەهامەتی و جینۆسایدە بەشی شەراكەتی ئێمە بووە لەگەڵ دەوڵەتی عێراق، لەگەڵئەوەیشدا لەدوای 1991 گەلی كوردستان ویستی لاپەڕەیەكی تازە بكاتەوە و لەپێناو یەكپارچەیی عێراق و ئاشتیدا لەگەڵ ئەو كەسانە دانیشت كە تاوانی جینۆسایدیان لەدژی گەلی كوردستان ئەنجامدابوو بەڵام بەداخەوە ئەو هەوڵەیش سەری نەگرت چونكە فەرهەنگی حاكم لە بەغدا فەرهەنگی بەپاشكۆدیتن و بەتاوانبارزانینی گەلی كوردستان بوو.

سەرۆك بارزانی هێمای به قۆناغی دوای 2003 دا كە گەلی كوردستان بە هەموو توانایەكەوە یارمەتیی بنیاتنانەوەی عێراقی دا لەسەر بنەمای دیموكراسی و فیدرالیزم و دەستوور و شەراكەت و تەوافوق و، ئومێدی بە ژیانێكی نوێ هەبوو بەڵام هەموو ئەو بنەمایانە بە دەستووریشەوە لە لایەن حكوومەتەكانی عێراق و فەرهەنگی باڵادەست لە بەغدا پشتگوێ خران و پێشێل كران و كار گەییشتە سەر ئەوەی وەك سزادانێكی سیاسی قووتی تێكڕای گەلی كوردستان بڕدرا كە ئەوە پێشێلكردنی مەترسیداری هەموو هەوڵێك بوو بۆ بنیاتنانی عێراق و مەسەلەی شەراكەت.

سەرۆك بارزانی ئەوەیشی خستەڕوو كە گەلی كوردستان ئەزموونێكی تاڵی هەیە لەگەڵ دەوڵەتی عێراق و هەموو ڕێگەیەكی بۆ پاراستنی عێراقی یەكگرتوو تاقی كردووەتەوە و قوربانی و باجی زۆری داوە بەڵام بێ ئەنجام بووە و دواجار بەو ئەنجامە گەییشتووە كە مادام نەتوانرێ شەراكەت بپارێزرێ و لەپێناو ڕێگەگرتن لە شەڕ و نەهامەتی و كێشەی مەترسیدار با وەك دوو دراوسێ لە تەنیشت یەكتردا بژیین. سەرۆك بارزانی ڕۆشنایی خستەسەر بڕیاری دیاریكردنی ڕۆژی بەڕێوەچوونی ڕیفراندۆم و جەختی لەوە كردەوە كە بە هیچ شێوەیەك پاشگەزبوونەوە لەو بڕیارە نییە و پێویستە خەڵكی كوردستان ڕای خۆیان لەبارەی چارەنووس و ئاییندەی خۆیان دەرببڕن و دوای ئەوەیش هەرێمی كوردستان دەكەوێتە گفتوگۆ لەگەڵ بەغدا و هەموو ڕێگەیەكی ئاشتیانە و دیالۆگ دەگرێتەبەر بۆ چارەسەركردنی كێشەكان و گەییشتن بە تەفاهومێك كە خزمەتی ئاشتی و ئاساییش و پێشكەوتنی هەردوولا و ناوچەكە بكات.

لەبارەی شەڕی داعشیشەوە سەرۆك بارزانی ئەوەی ڕاگەیاند كە گەلی كوردستان باجێكی زۆر گەورەی لەو شەڕە دا. پێشتر ڕێككەوتن هەبوو كە پێشمەرگە بەشێكە لە مەنزوومەی بەرگریی عێراق بەڵام ئەو ڕێككەوتنەیش جێبەجێ نەكرا و بەهۆی ئابلۆقەی چەندساڵەی چەك لەسەر پێشمەرگە، پێشمەرگە چەكی پێویستی نەبوو لەبەرانبەر ئەو تیرۆریستانەی كە باشترین چەكیان لەبەر دەستدابوو و یەكێك لە هۆكارەكانی جینۆسایدی ئێزیدییەكان ئەو ئابلۆقەیە بوو كە حكوومەتی عێراق بەسەر هێزی پێشمەرگەدا سەپاندی و بەمجۆرە حكوومەتی عێراق، كوردستان و پێكهاتەكانی عێراقی لە هەڕەشەی تیرۆریش نەپاراست. هەروەها لەبارەی ئەو ئاوارانەی ڕوویان لە هەرێمی كوردستان كردووە حكوومەتی عێراق كەمتەرخەم بووە لە یارمەتیدانی هەرێم وەك بڵێی بابەتی ئاوارەبوونی سەدانهەزار عێراقی كە لە هەرێم نیشتەجێبوون لە دەروەی سنوورەكانی عێراق ڕووی دابێت.

سەرۆك بارزانی هێمای بە ئۆپەراسیۆنی ئازادكردنی موسڵ دا و ئەوەی دووپاتكردەوە كە سەرباری هەموو ئەوانە پێشمەرگە یارمەتیی سوپای عێراقی دا و هێڵە بەرگرییەكانی داعشی تێكشكاند و ڕێگەی بۆ ئۆپەراسیۆنی موسڵ خۆش كرد. جەختیشی لەوە كردەوە كە هەماهەنگیی سەربازی لەگەڵ سوپای عێراق و ڕووبەڕووبوونەوە و تێكشكاندنی تیرۆر بۆ هەرێمی كوردستان ئەولەویەت دەبێت. سەرۆك بارزانی لە كۆتایی قسەكانیدا ئەوەی خستەڕوو كە هەرێمی كوردستان هاوكاری حكوومەتی عێراقی دەبێت لە شەڕی تیرۆر و داوایشی كرد یەكێتیی ئەوروپا و كۆمەڵگەی نێودەوڵەتی یارمەتیدەری گەلی كوردستان و عێراق بن لە پڕۆسەی دیالۆگ و چارەسەركردنی كێشەكانی نێوانیان و گەییشتن بە لێكتێگەییشتنێكی ئاشتیانە و هەروەها ئەوەیشی داوا كرد كە یەكێتیی ئەوروپا دژایەتیی مافە یاسایی و سرووشتی و ئیلاهییەكانی گەلی كوردستان نەكەن و گەلی كوردستان چاوەڕوانی ئەوەی لە ئەوروپا هەیە پشتیوانی ئەو مافانەیان بن و لە شەڕی تیرۆر و ڕووبەڕووبوونەوەی تەحەدیات پاڵپشتیان بێت.

23
حوزەیران

 

سه‌رله‌به‌یانیی ئه‌مڕۆ پێنجشه‌ممه‌ 22-6-2017 به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان، پێشوازی له‌ شاندێكی باڵیۆز و كونسولخانه‌كانی وڵاتانی یه‌كێتیی ئه‌ورووپا له‌ عیراق و هه‌رێمی كوردستان به‌ سه‌رۆكایه‌تیی به‌ڕێز پاتریك سیمۆنێت باڵیۆزی یه‌كێتیی ئه‌ورووپا له‌ عیراق كرد.

له‌ دیارێكدا شاندی میوان پوخته‌یه‌كیان ده‌رباره‌ی ناوه‌ڕۆكی دوا كۆبوونه‌وه‌ی وه‌زیرانی ده‌ره‌وه‌ی وڵاتانی یه‌كێتیی ئه‌ورووپا پێشكه‌ش كرد و قوربانیدانی پێشمه‌رگه‌ و خه‌ڵكی هه‌رێمی كوردستانیان له‌ ڕووبه‌ڕووبوونه‌وه‌ی تیرۆردا به‌رز نرخاند و هاوكاری و هه‌ماهه‌نگیی زیاتری نێوان هه‌ولێر و به‌غدایان له‌ ڕووبه‌ڕووبوونه‌وه‌ی تیرۆر و چاره‌سه‌ركردنی كێشه‌كان به‌ ڕێگه‌ی دیالۆگ، دووپات كرده‌وه.

سه‌باره‌ت به‌ ڕیفراندۆمی هه‌رێمی كوردستانیش، ئاماژه‌یان به‌وه‌ دا كه‌ یه‌كێتی ئه‌ورووپا خوازیاره‌ ئه‌وله‌ویه‌تی كاره‌كان له‌ شه‌ڕی دژی تیرۆرستانی داعش نه‌گۆڕیت، له‌مباره‌یه‌وه‌ به‌ پێویستیان زانی به‌ هاوكاریی دۆستان، گفتوگۆ و دیالۆگێكی جددی له‌ نێوان هه‌ولێر و به‌غدا ده‌ست پێ بكرێت.

لای خۆیه‌وه‌ به‌رێز سه‌رۆك وه‌زیرانی هه‌رێمی كوردستان سوپاسی ئه‌و سه‌ردانه‌ و هاوكارییه‌كانی وڵاتانی ‌یه‌كێتیی ئه‌ورووپا له‌ شه‌ڕی دژی تیرۆرستانی داعشدا كرد و دید و بۆچوونه‌كانی شاندی میوانی به‌رز نرخاند و ئه‌نجامدانی دیدار و كۆبوونه‌وه‌ی هاوشێوه‌ی به‌ پێویست زانی، هه‌روه‌ها جه‌ختی له‌وه‌ كرده‌وه‌ كه‌ هه‌رێمی كوردستان و به‌غدا پێویستیان به‌وه‌یه‌ ده‌ست به‌ دیالۆگێكی جددی له‌باره‌ی داهاتووی په‌یوه‌ندییه‌كان و پێكه‌وه‌ژیان و چاره‌سه‌ركردنی گرفته‌كان، بكه‌ن‌.

سه‌باره‌ت به‌ پرسی ڕیفراندۆمیش به‌ڕێزیان ئاماژه‌ی به‌وه‌ دا كه‌ ئه‌مه‌ خواست و ئیراده‌ی گه‌لی كوردستانه‌ به‌مه‌به‌ستی ده‌ستنیشانكردنی داهاتووی خۆی و جه‌ختی كرده‌وه‌ كه‌ ئه‌وله‌ویه‌تی هه‌رێمی كوردستان به‌رامبه‌ر شه‌ڕی دژی تیرۆرستانی داعش به‌ هیچ شێوه‌یه‌ك گۆڕانكاری به‌سه‌ردا نایه‌ت و‌ هاوكاری و هه‌ماهه‌نگیی نێوان هه‌ولێر و به‌غدا به‌تایبه‌تی له‌ نێوان هێزی پێشمه‌رگه‌ و سوپای عێراقدا له‌ ئاستێكی زۆر به‌رزدایه‌ و به‌هۆیه‌وه‌ سه‌ركه‌وتنی هاوبه‌شی گه‌وره‌ به‌ده‌ست هاتوون و له‌ هه‌وڵه‌كانیشیان بۆ له‌ناوبردنی داعش به‌رده‌وام ده‌بن.

سه‌باره‌ت به‌ دۆخی سیاسیی هه‌رێمی كوردستانیش، به‌ڕێز سه‌رۆك وه‌زیران ئاشكرای كرد كه‌ هه‌وڵێكی جددی هه‌یه‌ بۆ گه‌یشتن به‌ چاره‌سه‌رێكی گونجاو و له‌ هه‌وڵه‌كانیشیان به‌رده‌وام ده‌بن.

22
حوزەیران

 

ڕۆژی چوارشەممە 21ـی 6ـی 2017 لە شاری هەولێر بەڕێز مەسعود بارزانی سەرۆكی هەرێمی كوردستان بە مەبەستی شیكردنەوەی دوایین پێشهاتە سیاسییەكان و بارودۆخی شاری موسڵ و ڕیفراندۆم و گوزەرانی ئاوارەكان و ئاگاداربوون لە كێشە و گرفتەكانیان لەگەڵ كەسایەتی كۆمەڵایەتی و ئاكادیمی و سەرۆك هۆزە عەرەبەكانی پارێزگای نەینەوا و مەخموور كۆبۆوە.


لەو كۆبوونەوەیەدا سەرۆك بارزانی لە وتەیەكدا ئاماژەی بە بارودۆخی سیاسی و ئەمنیی پارێزگای نەینەوا و تێكشكانی سەربازیی تیرۆریستانی داعش دا و جەختی لەوە كردەوە كە ئەگەر هۆكارەكانی دەركەوتنی داعش چارەسەر نەكرێت هەڕەشەی دەركەوتنەوەی داعش بە شێوازی جۆراوجۆر بەردەوام دەبێت و پێویستە مامەڵە لەگەڵ ئەنجامەكان نەكرێ بەڵكۆ هۆكارەكان چارەسەر بكرێن. سەرۆك بارزانی هێمایشی بەوەدا كە چارەنووسی هەموو لایەكمان هاوبەشە و یارمەتیدانی ئاوارەكانیشی بە ئەركێكی مرۆڤی و برایانە لە قەڵەم دا.

لە بەشێكی تری وتەكانیدا سەرۆك بارزانی ڕۆشنایی خستەسەر بڕیاری ڕیفراندۆمی گەلی كوردستان كە لەسەر بنەمای ئەزموونێكی تاڵ لەگەڵ دەوڵەتی عێراق دراوە و بە دوورودرێژی باسی ئەو نەهامەتی و كارەساتانەی كرد كە لە سەدەی ڕابردوو لە لایەن حكوومەتەكانی عێراق بەسەر گەلی كوردستاندا هاتووە و مەرجی شەراكەت لەگەڵ گەلی كورد لە لایەن حكوومەتەكانی عێراق پێشێل كراوە. سەرۆك بارزانی لە درێژەی قسەكانیدا باسی لە قۆناغی دوای ڕووخانی ڕژێمی بەعس كرد و باسی لە بەشداریی كارای كوردستان كرد لە دووبارە بنیاتنانەوەی دەوڵەتی عێراق و نووسینەوەی دەستوور بەڵام بە شێوەیەكی نا یاسایی و نادەستووری وەك سزادانی هەرێم نانی خەڵكی كوردستان بڕدرا و هەر لەوە ڕۆژەی بڕیاریان لە بڕینی قووتی خەڵكی كوردستان دا هەر ئەوانەیش بڕیاریان لە دابەشكردنی عێراق دا. سەرۆك بارزانی مانەوەی بارودۆخی عێراقی بەمشێوەیە بە هەڕەشە و مەترسی زانی و ئەوەیشی خستەڕوو كە ناكرێ لە عێراقێكی یەكگرتوودا بمێنینەوە و شەڕ بكەین و كێشەكان قووڵتر ببنەوە و دوای ڕیفراندۆمیش كوردستان دەكەوێتە گفتگۆ و لێكتێگەییشتن لەگەڵ بەغدا بۆ گەییشتن بە چارەسەری گونجاو و ئاشتیانە و بەغدا و هەولێریش قووڵایی ستراتیژیی یەكتر دەمێننەوە.

هەر لەو كۆبوونەوەیەدا نوێنەرانی كەسایەتی كۆمەڵایەتی و ئاكادیمی و سەرۆك هۆزەكانی پارێزگای نەینەوا و مەخموور پرسیار و تێبینی و نیگەرانییەكانیان لەبارەی بارودۆخی ئاوارەكان و ئاییندەی ناوچەكانیان بۆ سەرۆك بارزانی خستەڕوو و سەرۆك بارزانیش وەڵامی تێبینی و پرسیارەكانی دایەوە و ئامادەبوانی لەوە دڵنیا كردەوە كە فەرهەنگی گەلی كوردستان فەرهەنگی پاراستنی كەرامەتی مرۆڤ و دژی جیاكارییە لەنێوان پێكهاتەكان، ئەوەیشی دووپاتكردەوە كە ئەوەی لەگەڵ داعش بێت چارەنووسی داعشی دەبێت و ئەوەی پەیوەندی بە داعش نەبووبێت كەرامەتی پارێزراوە و برای ئێمەیە. سەرۆك بارزانی داوایشی لە كەسایەتی كۆمەڵایەتی و ئاكادیمی و سەرۆك هۆزە عەرەبەكانی پارێزگای نەینەوا و مەخموور كرد كە بە ئازادییەكی تەواو لە ڕیفراندۆمدا بەشدار بن و خەڵكی ناوچەكە چ بڕیارێك لە چارەنووسی خۆی دەدات ئەو بڕیارە جێبەجێ دەكرێ و هیچ سیغەیەك بەسەریاندا ناسەپێندرێت.

13
حوزەیران

رۆژی دووشه‌ممه‌ 12-6-2017 به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان، پێشوازی له‌ به‌ڕێز فرانك بێكه‌ر باڵیۆزی به‌ریتانیا له‌ عێراق و شاندێكی یاوه‌ری كرد.

له‌ دیدارێكدا به‌ڕێز بێكه‌ر خۆشحاڵیی خۆی به‌ سه‌ردانی هه‌رێمی كوردستان ده‌ربڕی و باسی له‌ دوا پێشهاته‌كانی عیراق، شه‌ڕی داعش، ئازادكرنه‌وه‌ی مووسڵ و هه‌ماهه‌نگیی تۆكمه‌ی نێوان پێشمه‌رگه‌ و سوپای عێراق‌ كرد، هه‌روه‌ها نه‌به‌ردی و قاره‌مانێتیی پێشمه‌رگه و خه‌ڵك و حكوومه‌تی هه‌رێمی كوردستانی له‌ ڕووبه‌ڕووبوونه‌وه‌ی تیرۆر و حه‌واندنه‌وه‌ی ژماره‌یه‌كی یه‌كجار زۆری ئاواره‌ و په‌نابه‌رانی ده‌ستی تیرۆر، به‌رز نرخاند.

به‌ڕێزیان ئاماژه‌ی به‌وه‌ش دا كه‌ وڵاته‌كه‌ی خوازیاره‌ په‌یوه‌ندییه‌كانی له‌گه‌ڵ هه‌رێمی كوردستان له‌ هه‌موو بواره‌كاندا تۆكمه‌تر بكات. خستنه‌ڕووی تێبینییه‌كانی له‌سه‌ر ڕه‌وشی ئێستای عیراق و دیاریكردنی كاتی ئه‌نجامدانی ڕیفراندۆم له‌لایه‌ن‌ هه‌رێمی كوردستانه‌وه‌، لایه‌نێكی دیكه‌ی قسه‌كانی بوو.

لای خۆیه‌وه‌ به‌ڕێز سه‌رۆك وه‌زیرانی هه‌رێمی كوردستان سوپاسی ئه‌و سه‌ردانه‌ و پاڵپشتی و دۆستایه‌تی و هاوكارییه‌كانی به‌ریتانیای بۆ هه‌رێمی كوردستان و به‌تایبه‌تی دۆستایه‌تیی دێرینی به‌ڕێز بێكه‌ر له‌گه‌ڵ خه‌ڵكی هه‌رێمی كوردستان، كرد.

سه‌باره‌ت به‌ ڕیفراندۆمی هه‌رێمی كوردستانیش، به‌ڕێزیان ئاماژه‌ی به‌وه‌ دا كه‌ ڕیفراندۆم مافی خه‌ڵكی هه‌رێمی كوردستانه و دوای ئه‌نجامدانیشی حكوومه‌تی هه‌رێمی كوردستان خوازیاری ئه‌وه‌یه‌ له‌گه‌ڵ به‌غدا بكه‌وێته‌ دانوستانێكی جددی به‌مه‌به‌ستی گه‌یشتن به‌ ئه‌نجامێكی وا كه‌ ئارامیی بۆ ناوچه‌كه‌ دابین بكات.

له‌ به‌شێكی دیكه‌ی قسه‌كانیدا به‌ڕێزیان باسی له‌و هه‌ماهه‌نگییه باشه‌ی نێوان پێشمه‌رگه‌ و سوپای عێراق كرد كه‌ به‌هۆیه‌وه‌ سه‌ركه‌وتنی زۆر گه‌وره‌ به‌سه‌ر تیرۆرستاندا تۆمار كراون و دووپاتیشی كرده‌وه‌ كه‌ ڕیفراندۆم به‌ هیچ شێوه‌یه‌ك نابێته‌ ڕێگر له‌به‌رده‌م به‌رده‌وامیی هه‌رێمی كوردستان له‌ تێكشكاندنی تیرۆر، به‌ڵكو باشتر له‌ جاران ڕووبه‌ڕووی تیرۆر ده‌بنه‌وه‌ كه‌ مه‌ترسییه‌ بۆ سه‌ر هه‌موو جیهان.

پەڕەى 8 لەکۆى 41 پەڕەدا